Uma-kain rua hosi Maliana deside hamamuk rai estadu
BOBONARO, 12 outubru 2023 (TATOLI) – Ministériu Justisa liuhosi Diresaun Terra no Propriedade, munisípiu Bobonaro, kinta ne’e fasilita serimónia asina termu entrega rai no uma estadu ba Sentru Lojísitika Nasionál (CLN, sigla portugés) iha postu administrativu Maliana ne’ebé okupante uma-kain rua okupa desde tinan 1999 to’o 2023 ne’e deside hamamuk proprietáriu estadu ne’ebé lokaliza iha suku Holsa.
Iha okaziaun ne’e parte CLN mos entrega orsamentu ba kada fámilia montante $500 hodi apoia tranporta sasán ba fatin ne’ebé uma-kain rua ne’e deside hela ba, enkuantu akordu ne’e sasin hosi Sekretáriu Autoridade Munisípiu Bobonaro, Joao de Fátima do Carmo.
Reprezentante Diretór DTP munisípiu Bobonaro, Afonso Burubara, relata hafoin parte okupante no CLN Maliana hetan ona konkordánsia, ekipa tékniku sira halo kedas levantamentu ba rai ne’e atubele prodús mapa.
“Ha’u hakarak hateten de’it, proposta ne’ebé relasaun ho atribuisaun rai ba CLN hosi Ministériu Justisa atraves Diresaun Terra Proriedade, proposta ne’e prontu tiha ona, agora hein de’it prodús mapa, depois emvia ona ba Diretór Jerál, depois enkamiña ba ministru atubela aprovasaun legál,” nia hateten iha intervensaun.
Xefe Gabinete Prezidente CLN, Vasco da Cavesas de Araújo, reforsa prosesu negosiasaun atu hamamuk fatin refere desde iha mandatu governu anteriór nian, maibé la konsege implementa razaun governu troka ba-mai.
Tuir nia akordu refere foin mak implementa tanbá liu hosi esforsu autoridade munisípiu Bobonaro hodi bele hetan ona finalidade ba estatutu rai refere.
“Ida-ne’e prosesu final ida, interesante ba governu, katak bele atinje ona akordu ida finál, atubele hatene loloos estatutu fatin ida-ne’e nian, ita presiza tebes fatin ida-ne’e, haree ba katak CLN hanesan instituisaun estadu ne’ebé toma konta ba estoke nasaun ninian, ne’e presiza armazein barak,” nia katak.
Nia agradese ba família rua ne’e, tanba durante tinan 20-resin kontribui no ajuda CLN hodi tau-matan ba armazein refere.
Sekretáriu Autoridade Munisípiu Bobonaro, João de Fátima do Carmo, konsidera asaun ne’e okupante sira halo hanesan parte ida kontribui ba dezenvolvimentu nasionál.
“Ha’u lori prezidente autoridade munisípiu nia naran agradese ba uma-kain rua ne’e, kolabora tebes ho parte terra hodi halo proesesu ne’e to’o remata, ami mós agradese tanba durante tinan barak ita kontribui asegura ita-nia fasilidade no infraestrutura iha armazein ida-ne’e to’o agora sei di’ak,” nia afirma.
Okupante Miguel Mau-Buti Maia, deklara nia parte hakarak hamamuk fatin refere, hodi kumpre lei no regulamentu ne’ebé estabelese ona.
“Ha’u la hare ba osan nia montante, ha’u hakarak buat hotu-hotu ita tenke koopera malu, tanba lei mak obriga, ita atu hadi’ak ita-nia nasaun ne’e ita hanesan sidadaun tenke koopera ho estadu,” nia dehan.
Tuir planu CLN mos sei orsamentu atu kontrui moru no reabilita armazein tuan hodi akumula estoke produtu lokál ho kuantidade tonelada rihun 10.
Notísia relevante: CLN Sosa Ona Hare Kulit Tonelada 428 Hosi Maliana
Jornalista: Sérgio da Cruz
Editór: Evaristo Soares Martins
