OÉ-CUSSE, 13 outubru 2023 (TATOLI – Xefe suku Costa ho idade 69 iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), Aleixo Abi, sesta ne’e deklara prontu ona re-kanditu ba eleisaun suku períodu tinan 2023 iha suku Costa ba mandatu datoluk.
Nune’e iha loron sesta ne’e, aprezenta ona nia domumentu sira iha meza asembleia jerál iha sede suku Costa, ho lista apoiante hamutuk eleitór 123 ho númeru sorteiu tolu (3).
Notísia relevante: Asembleia suku no aldeia tenke serbisu ho imparsiál iha prosesu verifikasaun lista
Prezidente Meza Asembleia, Agustinho da Rosa, esplika, kandidatu xefe suku iha suku Costa hamutuk na’in-ualu inklui feto ida, submete ona dokumentu no aprovadu ona hodi konkore iha eleisaun suku.
Kandidatu dahuluk, Abelino Lobatu ho númeru sorteiu 1, Agustinho da Costa númeru sorteiu 2, Aleixo Abi númeru sorteiu 3, Bendito da Conceição númeru sorteiu 4, Francisco Colo númeru sorteiu 5, Job Romeo da Cruz Salu númeru sorteiu 6, Paulina Abi númeru sorteiu 7 no Rogério Landos númeru sorteiu 8.
“Hosi na’in-ualu ne’e, iha feto ida, no atuál xefe suku Costa re-kandidata ba dala tolu, ne’ebé ohin sira-na’in ualu submete ona dokumentu no pasa hodi konkore iha eleisaun suku,” Agustinho da Rosa anunsia ba komunidade sira iha sede suku Costa.
Iha biban ne’e xefe suku Costa Aleixo Abi, informa, iha mandatu dahuluk lidera suku Costa durante tinan hitu, hahú 2009 to’o 2015, iha 2016 kontinua kandidata-aan no konsege eleitu ba dalarua, hosi hosi 2016 to’o 2023 ne’e.
“Ha’u-nia mandatu mak sei termina iha tinan ne’e, maibé da’u deside no deklara ona iha antes katak, ha’u sei re-kandidata-an fila-fali ba períodu datolu ne’e, ida-ne’e pozisaun ha’u-nian, maibé depende ba konfiansa komunidade sira,” Xefe suku Costa, Aleixo Abi ba Tatoli iha sede suku Costa, sesta ne’e.
Nia hateten, área suku Costa luan tebes no envolve populasaun barak, tanba kuaze suku 18 mai konsentra hotu tanba hanesan suku ida iha Oé-Cusse vila.
TÁn ne’e, opta programa prioridade bainhira eletu tán ba dala-tolu, sei halo divizaun territoriÁl hodi fahe ba suku tolu, aldeia Oetfo ho Lakufoan sai suku ida, aldeia Mahata Kutete sai suku ida, aldeia Sanane no Oésono sai suku ida.
“Aldeia Sanene tenke fahe tán ba aldeia lima tán, tanba nia populasaun besik 9000, ne’ebé aldeia ida de’it labele, tan ne’e maka ha’u ajenda kedas iha ha’u-nia mandatu tuir mai karik eleitu-tán ba dalatolu, tanba programa ne’e ha’u inísia no hala’o ona to’o daudaun ne’e, maibé seidauk iha rezultadu ba legalidade hosi Governu,” nia katak.
Tuir nia, preparasaun kona-bá apoiante atu prienxe rekizitu sira, nia parte prontu ona tan ne’e maka iha sesat ne’e, hakat ba meza asembleia jerál hodi halo rejistu sai kandidatu ida iha eleisaun suku ba tinan ne’e.
Totál populasaun iha suku Costa hamutuk 47.466, komposta hosi aldeia lima; Sanane 11.237 mane 5.817 no feto 5.420.
Nune’e mós aldeia Mahata 1.899, mane 908 no feto 991, aldeia Oétfo 1.067 iha mane 544 no 523, aldeia Lakufoan 707 iha mane 357 no feto 350 no aldeia Oésono 2.441 iha mane 1.222 no feto 1.219.
Entretantu, durante kandidatura sira submete dokumentu ba meza asembleia suku, akompaña direita hosi ofisiál STAE, CNE, no PNTL. Purtantu loron eleisaun suku sei realiza iha loron 28 fulan outubru 2023 ne’e.
Notísia relevante: CNE Oé-Cusse ensera edukasaun sívika iha Pante Makasar prepara ba eleisaun suku
Jornalista: Abílio Elo Nini
Editór: Evaristo Soares Martins
