DNTT orienta ona motorista taka tarifa iha odamatan mikrolete
DILI, 13 outubru 2023 (TATOLI)–Diretór Jerál Transporte no Komunikasaun, Constâncio Pereira Soares, hateten, Diresaun Nasionál Transporte Terrestre (DNTT) fó ona orientasaun ba motorista transporte públiku liu-liu mikrolete sira atu kumpre rekezitu balun.
“DNTT orienta mikrolete hotu tenke iha ajudante atubele ajuda motorista, tanba nia tuur iha oin no ema tun hosi kotuk, ne’ebé pasajeiru ida nia atu estudante ka ema boot kuandu tun ona nia fó osan nia la’o daudaun, maibé kuandu iha ajudante pasajeiru selu la loos sira bele ejize. Kona-ba taka tarifa ne’e mós fasilita tantu ba motorista no pasajeiru tanba ema ida-idak haree ona presu, estudante selu tuir estudante, la’ós estudante selu ketak,” Diretór informa ba Agência Tatoli, iha ninia knaar fatin, Balide, sesta ne’e.
Notísia relevante : DNTT planeia reativa parajen antigu ba transporte públiku
Aleinde ne’e ne’e, Diretór klarifika, kona-ba greve ne’ebé motorista sira halo, ninia problema la’ós tanba folin kombustível aumenta maibé tanba pasajeiru sira selu la loos.
“Motorista sira halo tuir ona orientasaun sira hosi DNTT, nune’e bele redús ona sira-nia preokupasaun,” nia tenik.
Constâncio Pereira ne’e nota katak, dalaruma mikrolete balun halo greve ho razaun la klaru maibé seluk halo operasaun normál.
Iha tinan 2022, DNTT bolu ona motorista mikrolete, taxi no bus hodi forma asosiasaun ida nune’e bainhira mosu problema hanesan folin kombustível ka pasajeiru selu la loos, maka liuhosi asosiasaun bele buka dalan lalais.
“Se lae buat kiik ka boot sira halo grave, ida-ne’e difikulta tebes ba estudante sira. Maibé pedidu ba motorista sira ne’e to’o agora sira la mai fali hodi diskute kle’an liután,” nia akresenta.
Jornalista : Antónia Gusmão
Editora : Julia Chatarina
