DILI, 13 outubru 2023 (TATOLI)—Diresaun Nasionál Transporte Terrestre (DNTT) planeia ona hodi aplika tarifa fixu ba taxi sira ne’ebé halo movimentu iha kapitál Dili, nune’e laiha tan aplikasaun presu tuir hakarak.
“Ami halo ona planu, tenke aplika tarifa duni ba taxi sira, tanba ita halo hela ba mikrolete, tanba sá mak labele halo ba taxi, ne’e hanesan dikriminasaun. Ne’ebé ami mós iha hanoin ona atubele regulariza, ezemplu taxi tula pasajeiru ida hosi Becora bá destinasaun ida ne’e tenke selu hira? Tanba ne’e, tenke regula, se lae sira aplika tuir sira-nia gostu de’it,” Diretór Nasionál Transporte Terrestre, António da Costa, hateten ba Agência Tatoli, iha ninia knaar fatin, Balide, sesta ne’e.
Notísia relevante : DNTT La Autoriza Taxi Online Lais Funsiona Atividade
Diretór ne’e nota, daudaun taxi limitadu, tanba ne’e DNTT iha hanoin atu hatama taxi ho modelu hanesan kareta ho marka Avansa, nune’e bainhira sidadaun hosi nasaun seluk mai no hakarak vizita munisípiu seluk bele aluga.
DNTT mós sei reativa hikas kontrolu ba karreta taxi sira ne’ebé ho kondisaun ladi’ak maibé kontinua halai hodi tula pasajeiru inklui kontrola transporte públiku ne’ebé laiha ijiene.
“DNTT iha departamentu inspesaun, sira-nia servisu ba kontrolu karreta nia kondisaun no ijiene, maibé sira foku liubá inspesaun karreta nia kondisaun, ida seluk ijiene ne’e laiha. Antes ne’e iha ekipa ida tun ba terrenu hodi haree karreta, liu-liu taxi kondisaun a’at ami haruka sira hadi’a ka hatama ba ofisina hodi hadi’a di’ak tiha mak sira bele halo operasaun fali no bainhira iha bengkel, sira mak selu tanba ida-ne’e di’ak ba sira la’ós ba DNTT,” nia akresenta.
Programa ne’e antes ne’e iha maibé paradu tiha iha tempu naruk tanba limitasaun funsionáriu, enkuantu daudaun funsionáriu ne’ebé hakna’ar-an iha departamentu ne’e rua de’it.
“Ita seidauk bele halo rekrutamentu tanba laiha orsamentu ka desizaun hosi superiór,” nia tenik.
Jerente ne’e rekoñese katak, autoridade to’o oras ne’e seidauk hasai regulamentu aplikasaun tarifa ne’ebé orienta taxi atu kobra osan hosi pasajeiru sira.
“Daudaun taxi iha Timor iha modelu rua, ida mak argo seluk taxi kinur sira. Ida argo ne’e presu automátikamente regula maibé taxi seluk kobra osan bazeia de’it ba negosiasaun entre motorista ho pasajeiru,” nia salienta.
Antes ne’e, parte Diresaun simu ona informasaun hosi Polísia Tránzitu atu realiza reuniaun ida liga ho kondisaun transporte públiku no laiha ijiene.
Jornalista : Antónia Gusmão
Editora : Julia Chatarina
