Ema na’in-neen kompete eleisaun suku iha Bahú

BAUCAU, 13 outubru 2023 (TATOLI) – Kandidatura xefe suku na’in-neen sei kompete iha eleisaun komunitária iha Bahu, postu administrativu Baucau Vila,, munisípiu Baucau.

Prezidente meza asemblea suku Bahu atuál delegadu aldeia Ro-Ulo, Pedro Alves, kandidatura na’in-neen komposta hosi mane na’in-lima no feto na’in-ida ne’ebé prienxe ona rekizitu hanesan aprezenta lista apoiante pursentu 1 hosi totál vontate.

“Prosesu la’o normál tuir regra, laiha impedimentu durante verifikasaun dokumentu,” Prezidente meza asembleia suku hateten iha sede suku Bahú, sesta ne’e.

Meza asembleia anunsia lista kandidatura na’in-neen refere komposta hosi Eleuterio Boavida, Fabiana Ribeiro, Faustino Soares, José Gusmão, Manuel Gusmão no Miguel da Costa.

Rezultadu verifikasaun dokumentu hosi kada kandidatura prienxe tuir rekizitu tuir Lei númeru 9/2016 kona-ba xefe suku ne’ebé hetan observasaun direita hosi ofisiál supervizaun eleitorál CNE no STAE suku.

“Iha tempu ba sira atu hato’o planu programa ba komunidade hanesan parte hakbesik ba povu bainhira eleitu,” Pedro Alves akresenta.

Pedro Alves, argumenta, eleisaun suku iha Bahú sei realiza ho sussesu tanba kandidatura na’in-neen refere mesak Bahú oan no potensiál atu hadi’a suku iha futuru, importante labele halakon konfiansa ne’ebé povu ezerse ona iha eleisaun suku.

Totál eleitór iha suku Bahú hamutuk 7.220 hosi aldeia lima hanesan Ana-Ulo, Boi-le, Lamegua, Macada’e no Ro-Ulo.

Jornalista    : Natalino Belo 

Editór          : Evaristo Soares Martins