Embaixadór EAU simu PR Horta iha Dubai
DUBAI, 12 outubru 2023 (TATOLI)—Prezidente Repúblika (PR), José Ramos Horta, ho delegasaun, ohin, ho aviaun Singapura Airlanes to’o iha aeroportu internasionál Dubai, United Arab Emirabes (UAE), iha tuku 19h00 kalan oras Dubai.
Prezidente Repúblika, José Ramos Horta, simu direta hosi embaixadór Emiradu Árabe Unidu ba Indonézia no Timor-Leste Naun Rezidente, Abdullah Salem Aidhaheri, hodi hato’o benvindu ba Xefe Estadu ho delegasaun sira.
Hafoin ne’e, Xefe Estadu ho delegasaun kontinua desloka ba otél ne’ebé parte protokólu prepara hodi deskansa.
Enkuantu, vizita ofisiál Xefe Estadu ba Emiradus Arabes Unidus no partisipasaun iha Simeira ASEAN-GCC.
Prezidente Repúblika, José Ramos Horta, hala’o vizita ofisiál iha Emiradus Arabes Unidus (UAE) hahú hosi loron 13-15 fulan outubru 2023.
Iha inísiu tinan 2023, Prezidente Repúblika vizita Qatar hodi partisipa iha simeira Pais Menus Dezenvolvidu (LDC).
Durante vizita ne’e, Prezidente Repúblika sei hala’o sorumutu bilaterál ho nia omólogu, Sua Majestade, Sheikh Mohamed bin Zayed Al Nahyan, ho Prezidente Parlamentu, Primeiru-Ministru Dubai, ne’ebé mós hanesan Vise-Prezidente no “Liurai Dubai,” entre ofisiál sira seluk ne’ebé iha pozisaun aas iha nasaun ne’e.
PR Horta mós sei iha oportunidade atu hasoru malu ho setór privadu liuliu iha área investimentu nian, no sei vizita instalasaun refinária sira iha Abu Dhabi. Ajenda ofisiál ne’e mós inklui han-kalan ho Sekretariu Jerál ba Prémiu Zayed Fraternidade Umanu nian, Juis Abdusalam.
Iha tinan ida-ne’e nia rohan, Timor-Leste sei loke reprezentasaun diplomátika iha Abu Dhabi, hodi reforsa nasaun nia prezensa iha rejiaun ne’e.
Hafoin vizita ofisiál ne’e, iha sidade ida de’it, Prezidente Repúblika, ho konvite hosi Konferénsia Nasaun Unida nian kona-ba Komérsiu no Dezenvolvimentu-UNCTAD, sei kontinua partisipa iha sorumutu ida ho títulu “Semeira kona-ba Investimentu ba Lidér Globál,” ne’ebé sai hanesan oradór prinsipál ida.
PR mós sei partisipa iha meza redonda ida kona-ba “Estadus Dezenvolvimentu no Garante Investimentu Illa Kiik sira,” iha loron 16-17 fulan-outubru tinan 2023.
Iha loron 18 fulan-outubru, PR Horta no delegasaun sei halo viajen ba Riyadh, Arabia Saudita, iha ne’ebé sira sei partisipa iha Simeira ASEAN-GCC (Gulf Cooperation Council) iha loron 20 fulan-outubru 2023.
Iha sorumutu ne’e, Prezidente Repúblika sei hala’o sorumutu bilaterál ho lider sira Estadu Gulfu. Timor-Leste mak membru observadór ASEAN nian, asume hanesan kompromisu ida hodi asegura nia prezensa no partisipasaun iha sorumutu ASEAN hotu-hotu.
Aleinde ne’e, sorumutu ida-ne’e fó mós oportunidade, liuliu atu estabelese kontaktu nivel aas ho líder sira iha rejiaun ida-ne’e.”
Gulf Cooperation Council (GCC) inklui hosi Estadu Kuwait, Qatar, Oman, Arabia Saudita, Bahrain no Emiradus Arabes Unidus.
Durante vizita ne’e, Prezidente sei akompaña hosi Ministru Negósiu Estranjeiru no Kooperasaun (MNEK), Bendito Freitas, no Vise Ministra Asuntu ASEAN, Milena Rangel, ho delegasaun.
Tuir ajedna, Prezidente Repúblika José Ramos Horta no delegasaun sei fila hikas mai Timor-Leste iha loron 22 fulan outubru.
Jornalista : Nelson de Sousa
Editór : Cancio Ximenes
