Janeiru-setembru: BTL, E.P monta ona kontadór bee 800-resin iha kapitál Dili
DILI, 13 outubru 2023 (TATOLI)–Diretór Operasionál no Manutensaun Bee Timor-Leste, Empreza Públiku (BTL, E.P), Aleixo dos Santos, hateten hahú janeiru to’o setembru ne’e dirasaun halo ligasaun foun ba kontadór bee 800-resin ba populasaun sira iha kapitál Dili.
“Foin dadauk ne’e ita rejistu agregadu família 800-resin. BTL verifika rejistu sira-ne’e ekipa tékniku halo survey, entaun dada ona bee,” Aleixo dos Santos hateten ba Agêcia tatoli iha nia knar’ar fatin, Kaikoli, sesta ne’e.
Tuir rezultadu verifikasaun hosi tékniku BTL, E.P hatudu katak populasaun hotu rezidente Díli ne’ebé ekipa tékniku verifika ne’e iha rekursu bee ne’ebé sufisiente ba abitante sira iha Kapitál Dili.
Tuir nia, BTL, E.P simu resentemente uma kain 28 iha área Golgota, suku Comoro ne’ebé ba rejistu iha dirasaun atu halo verifikasaun, antes dada bee ba familia sira-ne’e.
Nia garante garante katak BTL, E.P iha materiál hanesan kontadór liu 4000 atu bele monta hodi dada bee ba populasaun sira, bainhira populasaun sira mai rejista naran iha BTL, E.P.
Responsável ne’e mós husu ba populasaun atu poupa bee iha tempu bailoron ida ne’e, tanba rekursu bee menus atu responde ba iha nesesisdade konsumidór sira-nia loro-loron..
Jornalista : Jesuína Xavier
Editor : Cansio Ximenes
