Komunidade Tirilolo sei ‘eskolla’ kandidatu na’in-haat iha eleisaun lideransa komunitária
BAUCAU, 13 outubru 2023 (TATOLI) – Kandidatura xefe suku na’in-haat sei kompete iha eleisaun xefe suku Tirilolo, postu admistrativu Baucau Vila.
Kandidatura na’in-haat refere komposta hosi xefe suku sesante Ricardo Ernesto Belo, atuál xefe aldeia Betulale Elvino Freitas Belo no joven Martinho da Costa Belo no Aldermiro da Silva Belo.
Kandidatura atuál xefe suku Tirilolo, Ricardo Ernesto Belo, esplika, razaun nia re-kandidatura hikas tanba kontinua hetan konfiansa hosi povu nune’e komunidade rasik buka apoiante hodi kandidatu ba eleisaun suku tinan-ne’e.
“Komunidade rasik hakarak entaun hau rona hodi deside kontinua re-kandidatura ba xefe suku,” Ricardo Belo hateten iha Vila Antiga, sesta ne’e.
Ricardo Belo, argumenta, hetan apoiante hamutuk 351 no submete de’it 69 tanba bazea ba kritéria pursentu ida hosi totál vontante.
Nune’e bainhira re-eleitu sei kontinua fó prioridade ba komunidade liuliu kria paz no estabilidade iha suku laran inklui proposta ba institusaun governu atu halo dezenvolvimentu iha suku.
“Kualkér kandidatura sé de’it mak povu fo fiar ha’u nafatin kontribui, importante mak hametin unidade no haburas demokrasia,” Ricardo Belo akresenta.
Elvino Freitas Belo nu’udar mós kandidatu hateten, razaun kandidata aan ba xefe suku tanba nu’udar festa demokrasia nune’e sidadaun hotu-hotu iha direitu atu kompete tuir lei haruka.
“Bainhira dokumentu submete ona, ami sei halo mini kampaña ou tama-sai uma,” Elvino Belo hateten.
Atuál xefe aldeia Betulale ne’e seidauk promete bainhira eleitu iha eleisaun suku, importante mak kandidatura nain-haat mesak Tirilolo oan nune’e presiza koopera malu inklui apoia malu hodi atende komunidade.
Elvino Belo, hetan apoiante hamutuk na’in-79 tanba submete ba regra tuir orientasaun Sekretáriadu Tékniku Administrasaun Eleitóral (STAE).
Totál vontante iha suku Tirilolo hamutuk 6.877 hosi aldeia neen komposta Betulale, Lutumutu, Parlamentu, Lialailesu, Caisido no Osso-ua.
Jornalista : Natalino Belo
Editór : Evaristo Soares Martins
