MD sei koopera ho IGEADE, I.P fó formasaun ba enjinaria militár
DILI, 13 outubru 2023 (TATOLI) – Ministru Defeza Donaciano da Costa Gomes ‘’Pedro Klamar Fuik’’ halo vizita kortejia ida ba Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P-sigla portugés), atu koalia futuru kooperasaun institusionál ho objetivu atu fó formasaun ba enjinaria militár oinsá uza ekipamentu pezadu hodi bele fó asisténsia umanitária ba sidadaun bainhira mosu dezastre ruma.
Governante ne’e hateten, kooperasaun ne’e mosu bazea ba orientasaun Primeiru-Ministru Xanana Gusmão ba Ministru Defeza katak militár sira-nia funsaun mak atu garantia defeza ba soberania nasionál, maibé aleinde ida-ne’e presiza haree mós envolve militár sira iha atividade sosiál no umanataria sira inklui orienta sira ba prosesu dezenvolvimentu Timor-Leste nian.
Tanba Ministru Defeza, haree ba F-FDTL iha Unidade Apoia Servsisu (UAS) iha mós militár enjinaria sira, entaun halo koordenasaun ho Ministru Obras Públika hodi vizita ba IGEADE, I.P atu futuru bele hetan formasaun téknika liuliu iha área utilizasaun ekipamentu pezadu ba militár sira bele konstribui liu ba prosesu dezenvolvimentu nasaun nian.
“Ohin ha’u mai halo vizita Ministériu Obras Públika partikularmente mai Institutu Jestaun Ekipamentu atu haree kondisaun ne’ebé mak sira atu sira bele hetn formasaun iha área utilizasaun materia pezadu nian”, Ministru Defeza Donaciano da Costa, hateten ba TATOLI bainhira halo vizita ba iha edifísiu IGEADE,I.P Colmera, sesta ne’e.
Tuir nia, militár nia servisu primaria mak oinsá garantia defeza ba soberania nasionál no atu fó asisténsia umanitaria ba ita-nia sidadaun.
“Sim, ouviamente ida kooperasaun ida-ne’e importante tebes ba ita-nia militár sira, tanba misaun komplemtár F-FDTL sekudária ne’ebé militár sira bele kontribui ba dezemvolvimentu ekonómia ita-nia rai mak atravéz hadia populasaun ninian nesesidade liuhosi hadia estrada ba povu hodi halo buat ruma ne’ebé mak ita-nia rai presiza”, nia adianta.
Iha fatin hanesan, Ministru Obras Públika, Samuel Marçal, hateten vizita Ministru Defeza mai iha IGEADE atu halo diskusaun kona-ba planu ba oin oinsá bele IGEADE bele fó formasaun ba militár sira.
“Karik imi hotu konkorda entaun atu haruka ita-nia maun alin sira hosi F-FDTL mai para imi fó treinamentu”, nia dehan.
Nia enkoraja funsionáriu IGEADE liuliu tékniku atu servisu ho fuan ho laran atu dezenvolvimentu Timor-Leste ho di’ak, labele hanoin buat oioin maibé foku ba servisu hodi servi povu no nasaun.
Jornalista: Natalino Costa
Editór : Zezito Silva
