MALIANA, 13 outubru 2023 (TATOLI)-Prezidente Autoridade Munisípiu (PAM) Bobonaro, Ernesto de Oliveira Barreto, husu ba joven sira-ne’ebé inklina-aan iha organizasaun arte-marsiál atu asegura eleisaun suku 28 outubru la’o ho ambiente pás no establidade.
Tuir nia, membru arte-marsiál iha papél importante atu asegura kualkér atividade ne’ebé la’o iha suku laran.
“Apela ba joven sira tomak liuliu arte-marsiál iha suku 50 atubele asegura eleisaun suku, se lae ita halo problema hakarak ou lakohi seguransa tenke tún,” nia informa ba jornalista sira, iha sede suku Holsa, sesta ne’e hafoin observa prosesu submete lista kandidatura ba meza asembleia suku.
Prezidente Autoridade Munisípiu ne’e mós enkoraja joven sira atu hili kandidatu tuir idak-idak nia hakarak.
Ernesto hatutan, demokrasia fó dalan ba ema ida hili kandidatu ida, maibé labele hasa’e ida defama fali ema seluk liuliu ema ne’e nia personalidade.
“Demokrasia mak hanorin ita hanesan, kandidatu iha suku ida bele to’o haat ou lima, maibé ne’e iha eleisaun mak bele fó julga, ida-ne’ebé mak imi gosta atu serbí imi, imi hili ba,” nia fó hanoin.
Enkuantu sentru votasaun ne’ebé iha Munisípiu Bobonaro prepara ba eleisaun lideransa komunitária 28 outubru ne’e hamutuk 193 kobre suku 50, postu administrativu neen.
Notísia relevante: Adjuntu PAM dezafia feto Bobonaro kandidata-an iha eleisaun suku
Jornalista: Sergio da Cruz
Editór: Evaristo Soares Martins
