UNFPA–AJTL asina akordu promove direitu saúde seksuál reprodutiva

DILI, 13 outubru 2023 (TATOLI) – Reprezentante UNFPA iha Timor Leste, Arifin Cabo, ohin, iha UN Kampaun, Caicoli, hateten Fundu Nasaun Unida ba Populasaun (UNFPA) ho Asosiasaun Jornalista Timor Lorosa’e (AJTL) asina akordu kona-ba promosaun direitu saúde seksuál reprodutiva iha Timor-Leste, liuhosi publikasaun notisiáriu ba sosiedade.

“Liuhosi pograma treinamentu, ami parseiru ho jornalista no organizasaun media sira atu oferese notísia ne’ebé bazeia ba evidénsia ba kestaun sira kona-ba saúde seksuál reprodutiva”, Cabo afirma.

Cabo salienta, atualmente mundu tama iha era dijitál ne’ebé espalla notísia falsa no informasaun ne’ebé la loos hodi fó impaktu ba feto no labarik sira-nia moris, nomeadamente dezafiu sira ne’ebé komplikadu ho partu ka hetan violasaun liuhosi relasaun seksuál.

Iha fatin hanesan, Prezidente AJTL, Zevonia Vieira, afirma  parseria ida ne’e signifikante hodi alkansa Objetivu Dezenvolvimentu Sustentável iha Timor-Leste. Nune’e, akordu ida ne’e sei hametin no hasa’e kapasidade jornalista nian liuhosi asuntu saúde seksuál reprodutiva.

“Ha’u sente orgullu tebes hodi asina MoU ohin ho Fundu Nasaun Unida ba Populasaun, tanba hakarak hametin no hasa’e kapasidade jornalista sira-nian kona-ba asuntu sira hanesan violénsia bazeia ba jéneru, saúde inan no juventude sira”, Zevonia konklui.

Jornalista : Felicidade Ximenes

Editór : Zezito Silva