VIQUEQUE, 14 outubru 2023 (TATOLI)—Feto potensiál hosi Viqueque hamutuk 21 rejista ona iha meza asembleia hodi kandidata-an ba xefe suku no kompete iha eleisaun suku ne’ebé sei realiza simultáneamente iha territóriu tomak, iha outubru tinan ne’e.
“Ha’u mós kandidata-an ba xefe suku ho apoiante hamutuk na’in-170 resin maka fó apoia ba ha’u sai xefe suku Carauballu, postu Viqueque Vila,” Prezidente Asosiasaun Feto Potensiál munisípiu Viqueque, Luciana Guterres, relata ba Agência Tatoli, iha suku Caraubalu, segunda ne’e.
Luciana nota katak períodu ida-ne’e feto barak maka hetan fiar hosi eleitór sira atu kompete iha eleisaun xefe suku tanba lei mós fó dalan ba feto hodi kompete iha eleisaun.
“Motiva ba ami feto Viqueque atu kandidata-an tanba iha ita-nia pasadu feto mós fó an ba mate hodi defende ba direitu feto. Tanba ne’e, feto Viqueque tenke kontinua ita-nia maluk feto sira-nia misaun hodi serví ba aldeia no suku. Ami feto kompete la’ós atu hadau liurai no kultura, maibé atu servisu ho Estadu iha nível aldeia no suku,” nia akresenta.
Notísia relevante : Viqueque aloka rihun $226-resin ba eleisaun suku
Nune’e, kandidatu xefe suku ne’e dehan, bainhira povu Caraubalu fó fiar ba nia, maka nia sei serbisu hamutuk ho entidade hotu hodi lori dezenvolvimentu ba oin.
“Atu lakon kamán, ita feto nafatin tenke esforsu-an hodi hakat la’o ba oin. Lakon hanesan buat normál, maibé ita presiza mantein kria pás no unidade iha suku no aldeia sira atu labele odi malu,” nia tenik.
Sekretariadu Tékniku Administrasaun Eleitóral (STAE) Viqueque rejista postu Lacluta feto kandidata-an ba xefe suku na’in-rua, Ossu na’in-neen, Uatucarbau na’in-haat, Uatulari na’in-lima no Viqueque Vila na’in-haat.
Enkuantu, kandidatu mane iha munisípiu Viqueque hamutuk na’in-135, kompostu hosi postu Lacluta na’in-14, Ossu na’in-32, Uatucarbau na’in-24, Uatulari na’in-26 no Viqueque Vila na’in-39.
Jornalista : Vitorino Lopes da Costa
Editora : Julia Chatarina
