VIQUEQUE, 14 outubru 2023 (TATOLI) – Diretór Sekretáriadu Tékniku Adiministrasaun Eleitorál (STAE) Munisípiu Viqueque, sabádu ne’e, simu ona akta lista kandidatura xefe suku hamutuk 156 husi postu adiministrativu lima.
Diretór STAE Viqueque, Humberto Fernandes, haktuir STAE simu ona lista kandidatura xefe suku sira ne’ebé entrega husi postu adiministrativu lima ne’ebé iha Viqueque hodi prodúz ba buletin votu nian.
“Ohin postu adiministrativu lima ne’e entrega ona akta kanditatura xefe suku nian ba ami hodi halo rekapitula hotu atu prepara fila buletin votu ba kandidatura hamutuk 156 ne’ebé horseik rejista iha meza asembleia 35 iha Munisípiu Viqueque”, Humberto Fernandes, hateten ba Agência Tatoli, iha Postu Viqueque Villa, sábadu ne’e.
Humbertu hatutan, akta kandidatura ne’ebé rekapituladu, STAE sei kontunia prodús buletin botu ba kandidatura ba eleisaun suku ne’ebé sei realiza 28 outubru 2023.
Tuir dadús, kandidatu ba xefe suku ho totál 156, kompostu husi feto hamutuk 21 no mane 135.
Akta kandidatura ba kada postu adiministrativu lima hanesan Lacluta kandidatu feto na’in-2 no mane na’in-14 no hamutuk na’in-16- Postu Ossu kandidatu feto na’in-6 no mane na’in-32 ho totál na’in-38- Uatucarbau kandidatu feto na’in-4 no mane na’in-24 ho totál na’in-28. Uatulari kandidatu feto na’in-5 no mane na’in-25 ho totál na’in-31. Postu Viqueque Vila kandidatu feto na’in-4 no mane na’in-39 ho totál 43.
Akta kandidatura ba xefe suku nian entrega husi funsionáriu hosi postu adiministrativu lima no akompaña husi ofisiál supervizaun Komisaun Nasionál Eleisaun (CNE-sigla Portugés) no birgada apoia suku husi STAE entrega iha edifísiu STAE Viqueque.
Jornalista : Vitorino Lopes da Costa
Editór : Zezito da Silva
