Autoridade postu Suai halo abertura desportu komunitáriu iha Suai Loro
COVALIMA, 16 Outubru 2023 (TATOLI)—Administradór postu administrativu Suai, Luzinho do Rego, segunda ne’e, halo abertura ba desportu komunitáriu voliból grupu feto no mane iha suku Suai Loro, postu administrativu Suai, munisípiu Covalima.
“Desportu komunitária ida-ne’e apoiu hosi sentru solidariedade sosiál no inkluzasaun (SSI) Covalima atu hametin lasu amizade no anima ita-nia komunidade, atu hamenus konflitu iha suku Suai Loro,” Autoridade postu Suai ne’e hateten liuhosi nia diskursu iha sede suku Suai Loro.
Programa desportu komunitária ne’e organiza hosi Sentru Solidariedade Sosiál, ho nune’e xefe suku ho komunidade sai hanesan komisaun organizadora, tanba ne’e la envolve asosiasaun voliból iha Covalima.
Atividade desportu komunitáriu la’o ho susesu depende hosi pesoál ida-idak, tanba programa desportu komunitária ida-ne’e organiza hosi xefe suku ho joven sira no SSI fasilita de’it.
Atu manán ka lakon ne’e la problema, maibé importante oinsá atu hametin lasu amizade hodi kria pás no estabiliade iha suku laran.
Diretór Sentru Solidariedade Sosiál no Inkluzasaun Covalima, Agapito Asis Cardoso, hateten objetivu organiza desportu komunitária iha suku sira-ne’e, importante mak atu redús konflitu.
“Ita realiza desportu komunitária voliból feto ho mane iha suku Suai Loro tanba halo koordenasaun servisu SSI Covalima ho xefe suku, ho intensaun atu kria amizade no redús konflitu iha suku,” nia dehan.
Objetivu Organiza desportu komunitária ne’e liga mós kona-ba feto ba pás, seguransa iha suku no kria pás ba joven feto no mane iha suku laran.
Atu organiza desportu komunitária, SSI Covalima servisu hamutuk ho entidade hotu, tanba iha postu no munisípiu balun mosu problema hodi afeta ba dezenvolvimentu pás no seguransa iha suku sira halo komunidade la hakmatek.
Ho implementasaun programa desportu komunitáriu bele kria situasaun amizade bele redús konflitu iha nivél suku, ema hotu partisipa hodi kontribui ba dezenvolvimentu kria pás no seguransa iha suku laran.
Tuir oráriu, desportu komunitária ne’e hala’o durante loron lima ne’ebé hahú iha segunda (16/10) no sei finaliza iha sesta (20/10), ne’ebé jogadór feto no mane mai hosi aldeia sira hanesan Acar Laran, Lo’o, Mane Icun no aldeia Loro.
Jornalista : Celestina Teles
Editór : Cancio Ximenes
