DILI, 16 outubru 2023 (TATOLI) – Bolseiru na’in-10 husi Aeroportu no Navegasaun Aérea Timor-Leste, Empreza Públika (ANATL,E.P) ne’ebé antes ne’e enfrenta problema pasaporte sei dezloka bá Indonézia, iha semana oin, hodi partisipa aula prezensiál iha Politeknik Penerbangan (Poltekbang) Surabaya no Sekolah Tinggi Penerbangan Indonesia (STPI) Curung, iha Jakarta.
Prezidente Konsellu Administrasaun ANATL, José Trindade da Cruz Pinto, hatete atividade prosesu aprendizajen iha POLTEK no STPI hahú tiha ona no durante ne’e benfisiáriu sira partisipa aula online tanba seidauk iha pasaporte.
“Estudante sira-nian pasaporte rezolve hotu ona. Agora ami-nian staff sira sei trata hela vistu iha embaixada Indonézia ne’ebé ami garante katak semana oin sira bele bá ona estuda iha Indonézia”, Prezidente ANATL dehan ba Tatoli iha Aeroportu Comoro, ohin.
Bolseiru sira ne’e foti kursu iha área Airport Electrical Engineer, Airport Civil Engineering, Air Navigation Engineering no Aerial fire fighting Engineering. Orsamentu ba bolsa estudu ne’ebé mai husi Fundu Dezenvolvimentu Kapitál Umanu (FDCH, sigla portugés) ho montante rihun $81-resin.
Aleinde bolseiru na’in-10 ne’e, iha mós timoroan na’in-rua ne’ebé mak uza osan rasik eskola iha fatin refere.
ANATL disponibiliza bolsa ba timoroan sira tanba kapasitasaun rekursu umanu iha navegasaun aérea ne’e importante tebes, nune’e sira bele iha koñesimentu kle’an no kapasidade espesífika hodi bele halo atendimentu di’ak ba públiku iha servisu aeroportuáriu no navegasaun aérea nian.
Iha sorin seluk, Diretór-Ezekutivu FDCH Cristovão dos Reis, informa katak nia rasik seidauk hetan dadus detallu kona-ba estudante na’in hira maka problema ho pasaporte tanba daudaun iha ekipa ida maka rekolla hela dadus.
“Ha’u seidauk bele ko’alia ba públiku kona-ba dadus estudante bolseiru ne’ebé sei problema ho passaporte, tanba ha’u seidauk kaer dadus”, afirma.
Lembra katak prosesu akizisaun kaderneta pasaporte eletróniku iha ona ninia faze finál no pakote dahuluk komesa entrega ona, iha semana kotuk, ba grupu prioritáriu sira mak hanesan pasiente sira ne’ebé presiza evakuasaun médika ba estranjeiru no sira ne’ebé akompaña, estudante, atleta no grupu prioritáriu sira seluk.
Notísia relevante: ANATL sei oferese bolsa estudu ba timoroan na’in-sanulu kontinua eskola iha Indonézia
Jornalista: Tomé Amado
Editora: Maria Auxiliadora
