DILI, 16 outubru 2023 (TATOLI)– Diretora Fundasaun CAUCUS, Teresinha Maria Cardoso, observa iha eleisaun órgaun komunitáriu, tinan ne’e, feto potensiál iha entuziasta kandidata-aan ba xefe suku hodi kompete ho mane sira.
Tuir dadus feto potensiál ne’ebé kandidata-aan ba Xefe suku iha territtóriu nasionál hamutuk 241 ne’ebé ekivalente 11,38 % no mane hamutuk 1.876, ekivalente 88,62 %.
Notísia relevante:Asembleia suku no aldeia tenke serbisu ho imparsiál iha prosesu verifikasaun lista
Feto hirak ne’ebé kandidata-aan ba Xefe Suku ne’e maioria hosi munisípiu Emera hamutuk 38, Dili na’in-27, Aileu na’in-27 no restante menus hosi na’in-20.
“Nune’e, ita kontinua hamutuk ho Governu no Plan Internasionál no parseiru sira seluk sensibilizasaun komunidade atu loke sira nia hanoin atu hatene kona-ba partisipasaun feto sai lideransa. Ita nia nasaun adota kultura demokrásia. Liuhusi atividade ne’e mak mane sira nia apoia importante ba feto sira atu kandidata-an ba xefe suku”, dehan Diretora CAUCAS iha programa intervista eskluzivu iha studio Agéncia Tatoli, Faról-Dili.
CAUCUS mós sei kontinua fó apoio formasaun ba feto sira iha área jestaun ba orsamentu sensivél ba igualdade jéneru atubele hala’o servisu iha suku no polítika atu servisu ho populasaun, vizaun no misaun ba suku, akompaña kandidatura, no seluk tan.
CAUCUS mós sei akompaña feto liuhosi semináriu nasionál atu promove feto sira nia kandidatura ba xefe suku no xefe aldeia.
Daudaun ne’e, nia afirma feto sira iha kapasidade atubele lidera ho mane sira nia apoio, maibé importante feto sira tenke fiar-aan atu kontribui ba dezenvolvimentu nasionál.
“Ita nia sensibilizasaun ne’e konsege enkoraja feto sira komesa fiar-aan hodi kandidata-aan ba lideransa lokál tanba feto iha kapasidade nivel estudu di’ak, esperiénsia ativu iha organizasaun no partidu polítik iha preokupasaun ba sosiedade nia moris”, nia afirma.
Nune’e, nia husu ba komunidade sira iha territóriu laran atu labele duvida fó votu ba kandidatura feto sira iha loron 28 outubru.
Kritériu ba kandidatura xefe suku mak timoroan ho idade 17 ba leten halo ona resenseamentu eleitorál hela duni iha suku no presiza kumpre rekizitu mak fotokópia kartaun eleitorál tahan 2, foto koloridu 3×4 tahan 2, prienxe formuláriu aseitasaun kandidatura, aprezenta lista apoiante 1% husi eleitór suku no ne’ebé kandidata-aan ba no fotokópia kartaun eleitorál apoiante sira.
Eleisaun lideransa komunitária sei realiza iha loron 28 outubru ne’ebé kada eleitór sei ezerse sira nia direitu votu iha sira nia áraa jeográfika mak define iha kartaun eleitór, ne’ebé tuir orientasaun lei númeru 9/2016, artigu 39, 48 no 68, katak eleisaun ba delegada/u xefe aldeia no xefe suku sei realiza iha kada aldeia, hodi hili membru sira iha konsellu suku.
Haktuir ba artigu 65.1 hatete katak aprezentasaun ba kandidatura xefe suku nian sei realiza iha loron sanulu resin lima molok loron eleisaun. Nune’e iha loron 13 outubru tinan 2023 sidadaun eleitór eleijivel sira iha territóriu Timor-Leste laran, ne’ebé iha interese ba kandidatu xefe suku, aprezenta ona sira nia kandidatura ba meza eleitorál suku iha sira nia suku ida – idak.
Notísia relevante: CNE fó ona edukasaun sivika ba ema rihun 25 kona-ba eleisaun suku
Jornalista: Jesuína Xavier
Editor : Florencio Miranda Ximenes
