Dezde 2017: PRADET rejista ema moras mentál iha dalan ninin 121
DILI, 16 outubru 2023 (TATOLI) – Koordenadór Programa Asisténsia Moras Mentál iha PRADET, Nicolau Vicente Ximenes, dehan PRADET rejista, iha 2017-2023, ema ho moras mentál iha dalan ninin hamutuk 121.
“Ita-nia atividade dalan ninin ne’e ita hahú iha 2017 to’o mai fulan juñu 2023, ita rejista ema ho moras mentál hamutuk 121, husi númeru ne’e iha 26 mak ita-nia ekipa sira konsege halo ona konesaun ho família hodi transrefere pasiente moras mentál ba Acute Care HNGV no sentru saúde formoza hodi hetan atendimentu saúde no hetan rekuperadu hodi fila ba sira-nia família”, Nicolau Vicente Ximenes informa ba TATOLI iha nia kna’ar fatin Manleu, ohin.
PRADET husu ba Ministériu Saúde atu reforsa liután rekursu umanus hodi fó tratamentu ba ema ho moras mentál iha nível sentru saúde no postu saúde sira liuhosi destakamentu pesoál hanesan médiku, enfermeiru ne’ebé mak dedikadu no iha koñesimentu ne’ebé adekuadu ba tratamentu psikiatria nian.
“Ami sujere ba Governu atu bele mellora servisu tratamentu médiku liuliu ba aimoruk nian atu aimoruk sira labele estoke mamuk bebeik no distribuisaun aimoruk ba fasilidade saúde mais regulár atu ita-nia pasiente sira konsumu aimoruk ho regular no labele kotu hodi prezudika ba sira-nia mudansa negative”, nia afirma.
Nune’e nia dehan, durante ne’e PRADET kobre ba to’o munisípiu hitu hanesan Aileu, Ainaro, Baucau, Bobonaro, Dili, Ermera no Liquiça.
Tuir dadus, dezde 2002, PRADET rejista ona ema ho moras mentál hamutuk 1.831, husi ne’e mane 796 no feto1.035. hirak ne’e halo ona tratamentu saúde iha fasilidade saúde.
Jornalista : Felicidade Ximenes
Editór : Zezito Silva
