DILI, 16 outubru 2023(TATOLI)-Inspetór hamutuk ema-22, kompostu hosi mane 16, no feto 6 hosi Gabinete Ministériu Asuntu Kombantente no Libertasaun Nasionál (MACLN-sigla portugués), segunda ne’e, partisipa ona formasaun kona-ba jestaun finansa públika liuliu sistema aprovizionamentu no kontratu públiku.
Formasaun ne’e hala’o durante loron lima hahú hosi loron 16 to’o 20 fulan-outubru 2023 ho tema “Haklean koñesimentu kona-ba aprovizionamentu no kontratasaun públiku hodi garante kualidade inspesaaun auditória iha instituisaun públiku”.
Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru” husu ba inspetór sira atu iha vontade no sériu durante formasaun ne’e la’o, atu nune’e bele eleva esperénsia hodi kontribui ba dezenvolvimentu instituisaun Estadu nian iha futuru.
“Ha’u rekomenda ba formandu sira, se vontade mak mihis signifika sei la hetan buat ruma tanba formasaun loron lima ne’e hanesan oportunidade di’ak ida atu aprende tanba gabinete inspesaun auditória sai fatór determinante,”nia hateten hafoin abertura formasaun ne’e iha Sentru Formasaun Profesionál no Empregu Tibar.
Iha fatin hanesan Inspetór MAKLN, Aniceto Brites, hateten liuhosi formasaun ida-ne’e gabinete inspesaun auditória bele iha rekursu umanu ne’ebé natón hodi asegura prosedimentu hotu tuir legalidade bainhira halo jestaun ba finansa públika bainhira ezekuta orsamentu jerál Estadu tinan-tinan.
Nune’e mós Diretora Aprovizionamentu Ministériu Finansa (DNA-MF), Evangelina Guterres agradese no apresia ba MAKLN tanba hili nia atu sai formadora hodi fó formasaun ba formandu sira kona-ba jestaun finansa públika liuliu jestaun finanséiru no sistema aprovizionamentu.
Jornalista : Osória Marques
Editór : Agapito dos Santos
