VIQUEQUE, 16 outubru 2023 (TATOLI)—Polísia Nasionál Timor-Leste (PNTL) munisípiu Viqueque rejista ona krime hamutuk 85, durante fulan-tolu, hahú jullu to’o setembru tinan ne’e.
“Ha’u-nia mandatu iha Viqueque atu ba fulan-haat ne’e ami rejista kazu krime hamutuk 85. Kazu hirak ne’e númeru a’as liu mak ofensa integridade fíziku hamutuk 45, violénsia doméstika 35, abuzu sexuál rua no kazu tolu seluk tan. Kazu hirak ne’e maka durante fulan-tolu ami rejista,” Komandante PNTL munisípiu Viqueque, Superentendente, João da Costa, informa iha ninia knaar fatin, Beskem, segunda ne’e.
Notísia relevante : PNTL Viqueque Rejista Krime Violénsia Doméstika ho Totál Kazu 170
Kazu hirak ne’e aprezenta no rejista ona iha Ministériu Públiku (MP) hodi halo prosesu.
“Ami mós kontinua koopera serbisu ho MP atu oinsá bele kontinua prosesu kazu sira ne’ebé ami rejista ona,” nia akresenta.
Nia dehan, PNTL durante ne’e halo sosializasaun ba abitante sira kona-ba prevensaun violénsia no prosesu rejistu kazu krime sira, nune’e daudaun abitante sira bele hatene ona prosesu rejista kazu ba PNTL.
Rekursu membru Polísia efetivu serbisu hosi postu eskuadra lima iha munisípiu Viqueque hamutuk na’in-126 inklui membru Polísia ne’ebé foin lalais reforma hamutuk na’in-11, nune’e membru ativu daudaun ne’e hamutuk 137.
Jornalista : Vitorino Lopes da Costa
Editora : Julia Chatarina
