SEKOMS promete dezenvolve RAKOM Maliana
BOBONARO, 16 outubru 2023 (TATOLI)-Sekretáriu Estádu Komunikasaun Sosiál (SEKOMS), Expedito Dias Ximenes, Segunda ne’e vizita Rádiu Komunidade (RAKOM) Maliana ho Objetivu atu haree besik liután kondisaun no problema ne’ebé rádiu ne’e enfrenta.
Expedito Dias Ximenes, hateten programa IX governu tau prioridade ba dezenvolvimentu rádiu komunidade sira, atu responde ba polítika desentralizasaun administrativa no podér lokál.
Nia parte ko’alia ona ho Ministru Administrasaun Estatál, Tomás Cabrál, atu tau orsamentu natoon ba Autoridade Munisípiu sira iha Orsamentu Jerál Estádu (OGE sigla Portugues) tinan fiskál 2024 iha área komunikasaun hodi dezenvolve rádiu komunidade sira, atubele foka liubá servisu ba interese komunidade nian.
Notísia relevante: RAKOM Maliana 91,07 FM transimite to’o Hali-Wen Atambua
“Agora IX Governu Konstituisionál iha lideransa maun-boot Xanana Gusmão, tau atensaun ba rádiu komunidade tanba rádiu komunidade mak sai liña frente informasaun ba komunidade,” Expedito informa durante halo enkontru ho jestór rádiu komunidade Maliana, iha bairru Hospital Tuan, Maliana.
Nia observa RKM hasoru hela difikuldade no problema balun, maibé nia apresia ba jestór rádiu ne’e tanba iha inisiativa no kreatividade rasik hodi hadi’ak kondisaun no fasilidade iha estúdiu hodi transmite informasaun ba komunidade munisípiu Bobonaro.
Nia husu ba jestór RKM orienta jornalista sira atu hakbesik liu ba baze hodi halo kobertura ba problema sosiál ne’ebé komunidade sira enfrenta iha setór edukasaun, agrikultura, saúde, ekononía no problema sosiál sira seluk.
“Rádiu komunidade tenke rádiu ba duni komunidade, labele atende liu ba prezidente autoridade no administradór postu nia atividade, maibé sé bele kobre mak atividade populasaun sira-nian, karik haree ba persentajen bele fó 40% ba atividade serimoniál, 60% ba atividade komunidade nian, hodi núne’e komunidade sira bele sente katak, rádiu ne’e rádiu sira-nian,” Governante ne’e fó hanoin.
Eis Konselleiru Konsellu Imprensa ne’e, husu ba RKM atu koordena ho órgaun administrasaun eleitorál sira hansan Komisaun Nasionál Eleisaun (CNE, sigla portugués) no Sekretariadu Tékniku Administrasaun Eleitorál (STAE) hodi fó espasu kobrtura kona-bá prosesu eleisaun suku.
Jestór Rádiu Komunidade Maliana, Filomeno Magalhães, agradese no konsidera vizita Sekretáriu Estádu Komunikasaun Sosiál ne’e bele responde sira-nia problema kona-bá komputadór no fasilidade sira seluk tán.
“Ami-nia difikuldade ne’ebé durante ne’e enfrenta maka kona-bá transporte, ami iha deit motorizada rua, ita haree katak oras ne’e ida kondisaun aat, maibé ida-ne’e la sai kestaun, tanba durante ne’e ita mós iha kooperasaun ho parte Tatoli no RTTL hodi núne’e bele hala’o nafatin servisu,” nia katak.
Filomeno Subliña, durante ne’e jornalista RKM sira mos iha liña koordensaun di’ak ho liña ministeriál no líder komunitária sira hotu hodi halo kobertura ba atividade governu no komunidade nian ne’ebé lao iha postu administrativu, suku no aldeia sira.
Enkuantu Rádiu Komunidade Maliana eziste iha 20 abríl tinan 2000 tempu UNTAET nian to’o oras ne’e iha rekursu umanu na’in-hitu komposta hosi jestór, administrasaun, finansa no jornalista.
Notísia relevante: RaKom Maliana Enfrenta Problema Orsamentu
Jornalista: Sérgio da Cruz
Editór: Evaristo Soares Martins
