CNE koordena ho autoridade Covalima kona-ba realiza eleisaun Suku
COVALIMA, 17 outubru 2023 (TATOLI)—Komisaun Nasionál ba Eleisaun (CNE-sigla portugés) halo reuniaun koordenasaun ho autoridade-sira iha munisípiu Covalima nune’e bele hala’o eleisaun suku ho di’ak.
“Ohin, ami halo enkontru hamutuk ho autoridade Covalima relasiona eleisaun suku sei hala’o iha loron (28/10) tinan ne’e, ita halo ona preparasaun no ita hakarak hala’o eleisaun ho di’ak tenke iha koodenasaun di’ak,” Prezidente CNE José Belo, hateten ba jornalista-sira, iha edifísiu CNE Covalima, Tabakolot, tersa ne’e.
Iha enkontru koordenasaun ne’e autoridade sira, diskute bainhira realiza eleisaun saida mak presiza atu tulun malu hodi halo esplikasaun ba malu, nune’e komunidade hili sira-nia lideransa komunitária rasionál ho responsabilidade.
“Preparasaun ba eleisaun suku, CNE halo edukasaun sívika ba eleitór sira tanba ita hakarak realiza eleisaun suku la’o di’ak,” nia dehan.
Administradór munisípiu Covalima, Francisco de Andrade, hateten atu realiza eleisaun suku, hala’o enkontru koordenasaun importante nune’e bele realiza eleisaun ho susesu.
“Hala’o enkontru koodenasaun importante relasiona atu realiza eleisaun líder komunitária, ha’u atu informa katak prosesu balun ita la’o ona,” nia dehan.
Nakait ho atu realiza eleisaun suku, autoridade Covalima fó ona orientasaun funsionáriu iha postu administrativu hotu, hahú hosi sesta (13 outubru 2023), kandidatura submete ona dokumentu, funsionáriu ida-idak ba nia suku atu fó apoiu ba prezidente meza asembleia sira.
Eleisaun suku iha munisípiu Covalima, iha posibilidade tama iha segunda ronde tanba kada suku iha nia kandidatura liuhosi ema nain-rua (2) no balun to’o na’in-10 iha suku Laktos, Usecai no suku Zulo mak nia kandidatura na’in-rua (2) de’it.
Eleisaun suku ba tinan 2023 na’in mak administrasaun munisípiu Covalima, Sekretáriu Tékniku Administrasaun Eleitorál (STAE) hanesan tékniku tanba eleisaun suku tenke maiória absoluta 50+1 foin bele sai vensedór.
CNE realiza reuniaun koordenasuan importante, tanba ne’e presiza iha kolaborasaun hotu nune’e prosesu eleisaun la’o ho di’ak hodi realiza eleisaun suku ho susesu.
Tuir dadus hosi Sekretáriu Tékniku Administrasaun Eleitorál (STAE) Covalima, totál eleitór hosi munisípiu Covalima ne’ebé mai hosi postu administrativu Fatululik, Fatumea, Fohorem, Fatumea, Tilomar, Maucatar, Zumalai no Suai hamutuk 49.469 ne’ebé kompostu hosi mane hamutuk 2.5220 no feto hamutuk 2.4216.
Aleinde ne’e, STAE mós rejista eleitór mate iha munisípiu Covalima hamutuk na’in 353 ne’ebé kompostu hosi mane na’in-186 no feto na’in-167.
Enkuantu, bazeia ba dadus iha tinan 2022 STAE Covalima rejista eleitór elizível hamutuk 48.830 kompostu hosi mane 24.950 no feto 23.880
Jornalista : Celestina Teles
Editór : Cancio Ximenes
