F-FDTL-TNI mantein programa kooperasaun INAMOR
DILI, 17 outubru 2023 (TATOLI) – Falintil–Forsa Defeza Timor-Leste reafirma kooperasaun téknika militár ho Tentara Nasional Indonézia (TNI) liuhosi programa Indonézia Timor (INAMOR).
Programa kooperasaun INAMOR nu’udar programa anuál entre Timor-Leste ho Indonézia ne’ebé haree liubá área kooperasaun téknika militár entre F-FDTL no TNI oinsá TNI bele tulun militár F-DTL hodi fó fomasaun téknika militár, hahú hosi soldu to’o ofisiál sira.
Programa kooperasaun militár INAMOR ne’e desde estabese iha 2015 no agora kompleta ona tinan ualu.
Atu reafirma kooperasaun ida-ne’e, tenke liuhosi enkontru entre F-FDTL no TNI ne’ebé prezide direta hosi Estadu Maiór F-FDTL tantu mós TNI.
Iha loron 17 fulan outobru 2023 Timor-Leste mak sai uma nain ba enkontru kooperasaun téknika militár ne’ebé prezide direta hosi Xefe Estadu Maiór Forsa Defeza Timor-Leste (F-FDTL), Brigadeiro Jenerál José da Costa ‘Trix’.
Hafoin reuniaun, Xefe Estadu Maiór F-FDTL, José da Costa Trix, hateten prezensa delegasaun forsa armada Indonézia mai Timor-Leste ho objetivu ida atu reafirma kooperasaun téknika militár INAMOR ne’ebé mak Governu liuhosi F-FDTL no TNI halao kle’ur ona.
“Ohin ne’e ita halo kontinuasaun reuniaun anuál ba programa kooperasaun tékniku ne’ebé hanaran INAMOR tinan ne’e. Iha enkontru ne’e ita koalia asuntu tolu, ida mak mantein hodi reafirma kooperasaun téknika militár ho Indonézia oinsá atu dezenvolve ita-nian forsa hosi forsa gerilla ba forsa profisionál, nune’e sira (TNI) bele fó kapasitasaun rekursusu umanu ba ita-nia forsa sira hosi prasa to’o ofisiál”, Xefe Estadu Maiór F-FDTL José da Costa hafoin remata enkontru ho delegasaun TNI iha Ótel Novu Turizmu, tersa ne’e.
Pontu daruak mak husu ba TNI fó apoiu militár F-FDTL bele tuir trenamentu militár iha fatin ne’ebé de’it iha nasaun sudeste Aziátiku nune’e ba futuru F-FDTL bele dezenvolve nia aan tuir mundu agora. No pontu datoluk ne’ebé Komandu F-FDTL reafirma iha kooperasaun INAMOR mak F-FDTL husu ba TNI atu bele fasilita F-FDTL bele envolve iha atividade forum ASEAN no iha nivél internasionál.
“Ita bo’ot sira hatene hosi kooperasaun téknika militár ita ho Indonézia liuhosi programa INAMOR ita-nia militár hamutuk 230 mak benefisia ona hosi programa ne’e, tanba ne’e ohin ita kontinua kooperasaun ida-ne’e atu kontinua fó formasaun ba ita-nian membru F-FDTL sira”, nia adianta.
Iha fatin hanesan, Reprezentante Panlima Tentara Nasional Indonesia (TNI), Brigadeiru Jenerál Zainuddin, hateten, TNI kontinua kompromisu apoia Timor-Leste iha área kooperasaun téknika militár.
“Ohin ami halo enkontru kontinuasaun hodi hametin liután kooperasaun militár ne’ebé mak TNI no F-FDTL iha ona no TNI iha komitmentu kontinua apoia F-FDTL iha área formasaun militár sira”, nia konklui.
Jornalista: Natalino Costa
Editór : Zezito Silva
