GJPRO no KFP realiza fórum armoniza serbisu jestaun rekursu umanu iha Viqueque
VIQUEQUE, 17 outurbru 2023 (TATOLI)—Grupu Jestór Profesionál Rekursu Umanu (GJPRO) iha Viqueque hamutuk ho Komisaun Funsaun Públika (KFP), kuarta ne’e, realiza fórum hodi armoniza serbisu Jestór Rekursu Umanu nasionál no munisipál hodi buka solusaun ba problema ne’ebé funsionáriu sira enfrenta durante ne’e.
Enkontru ba dala-V ne’e ho tema ‘kapasidade rekursu umanu iha planeamentu forsa traballu nu’udar xave atinjimentu no objetivu’.
Koodenadór GJPRO, Agustinho Quelo, hateten, objetivu atividade ne’e atu atualiza no disamina instrumentu legál, prosedimentu operasionál no tékniku sira iha instituisaun ida-idak, inklui dezenvolve mekanizmu no estratejia nesesáriu atu asegura instrumentu legá sira.
“Atu identifika dezafiu sira ne’ebé maka daudaun ita-nia serbisu rekursu umanu sira enfrenta, tantu iha nível munistériu inklui munisípiu sira hodi buka solusaun. Karik ita iha problema ruma liga ba pagamentu, rekrutamentu, no promosaun, ida-ne’e maka durante ne’e rekursu umanu sira iha nível ministériu no munisípiu sira hasoru,” Koordenadór relata hafoin atividade, iha salaun administrasaun munisipál, tersa ne’e.
Notísia relevante : Prezidente KFP: Lei fó dalan governante halo ezonerasaun ba kargu xefia
Tanba ne’e, grupu ne’e buka asegura funionamentu tanba serbisu rekursu umanu sai papel importante ida iha kada instituisaun sira.
“Hahú tinan 2011, ami bolu malu forma fórum GJPRO atu oinsá ajuda Komisaun Funsaun Públika sai hanesan ponte ida ho instituisaun Estadu sira, liu-liu ba serbisu rekursu umanu sira hodi hafasil serbisu,” nia akresenta.
Fórum GJPRO realiza kada fulan, ne’ebé ministériu no munisípiu ida sai uma-na’in, nune’e tinan ida ne’e Viqueque sai uma-na’in.
“Durante ne’e ami rekomenda buat barak ba KFP maka hanesan sistema pagamentu saláriu ba funsionáriu hodi funsionáriu asesu fasil iha banku sira, sistema promosaun grau, no subsídiu transporte ba funsionáriu ne’ebé daudaun ne’e implementa hela,” nia relata.
Iha fatin hanesan, Prezidente KFP, Faustino Cardoso, hateten, orden serbisu hodi tane serbisu profisionál, serbisu ho ezemplár, serbisu netrál, la halis ba A ka B, maibé tenke nafatin tane a’as espíritu profisionalizmu no responsabilidade profisionál atu serbisu ho kualidade ba Estadu, nasaun no ba povu Timor Leste.
“Ohin ita hamutuk ho jestór rekursu umanu sira, polítika saida de’it maka ita atu implementa depende ba rekursu umanu ne’e rasik. Jestaun rekursu umanu asume papel importante hodi halo planeamentu hamutuk ho orden relevante sira oinsá hasa’e kapasidade no hasa’e konsiésia ba serbisu iha instituisaun ida-idak ne’ebé serbisu ba,” nia subliña.
Sekretáriu munisípiu Viqueque, Teotónio Sarmento da Silva, konsidera presiza hadi’a rekursu umanu hodi prepara dezentralizasaun.
“Ami rekomenda ba Funsaun Públika atu hadi’a rekursu umanu sira iha munisípiu hodi prepara ba desentralizasaun. Karik Governu oferese ba munisípiu, ita bele preparadu,” nia hato’o.
Atividade ne’e partisipa hosi diretór nasionál rekursu umanu hosi kada ministériu no sekretaria kada munisípiu inklui diretór rekursu umanu sira iha munísipiu sira.
Jornalista : Vitorino Lopes da Costa
Editora : Julia Chatarina
