Komunidade Laclo-Laclubar susar asesu ba ambulánsia
DILI, 17 outubru 2023 (TATOLI) – Reprezentante povu iha Parlamentu Nasionál liuhosi Deputada Bankada FRETILIN, Cristina Yuri Rebelo dos Santos Costa, dehan komunidade iha Postu Saúde Laclo no Laclubar sorin balun susar asesu ba ambulánsia bainhira ema moras.
“Ministériu Saúde tenke tau atensaun sériu ba ita-nia komunidade sira iha Postu Saúde Laclo no Laclubar Munisípiu Manatuto, iha de’it kareta saúde nian ida de’it maske populasaun iha Laclo no Laclubar sorin balun barak tebes, kareta ida de’it labele halo atendimentu hotu ba komunidade sira ne’ebé mak moras ne’e, ema moras ho inan sira ne’ebé atu partu tenke hadau malu kareta ida-ne’e problema”, Deputada Cristina hateten iha sesaun plenária Parlamentu Nasionál, ohin.
Tanba ne’e, reprezentante povu ne’e alerta ba Ministériu Saúde (MS) atu fó atensaun másima ba komunidade hirak ne’e, liuliu inan isin rua sira susar tebes atu halo transferénsia hosi Postu Laclo ba Sentru Saúde Manatuto Vila.
Aleinde ne’e, iha mós postu klínika ida lokaliza iha Aldeia Reabutigeon iha Suku Uma-Caduac Posto Administrativu Laclo Munisípiu Manatoto la iha atendimentu públiku ho di’ak.
“Postu klínika iha Reabutigeon ne’e komunidade barak mak asesu ba klínika ne’e iha Suku Uma-Caduac nia laran kompostu hosi Aldeia Hahihoho, Condar no Ilimano laiha atendimentu públiku ida ba sira, laiha doutór iha klínika ne’e, laiha funsionáriu Ministériu Saúde, aat liu tan mak laiha ai-moruk iha klínika ne’e, sira só iha de’it kader saúde ida de’it, nia servisu kada loron simu de’it telefone no tratamentu administrativu, komunidade sira la’o dook ba Laclo mak halo tratamentu”, nia hatete.
Nune’e, nia husu ba MS atu tau atensaun sériu ba problema ne’e tanba populasaun barak mak asesu ba klínika iha Rebutigeon.
Postu Administrativu Laclo tuir dadus ne’ebé iha populasaun hamutuk ema na’in 7.618 kompostu hosi Suku haat mak hanesan, Hohorai ho nia populasaun hamutuk 909, Laku Mesak ho nia populasaun 2.857, Uma-Caduac ho nia populasaun 2.967 no Uma-Naruc ho nia populasaun 885.
Jornalista: Hortencio Sanchez
Editór : Zezito Silva
