Konstrusaun armazén rai ai-moruk iha Viqueque atinje 57,38%
VIQUEQUE, 17 outubru 2023 (TATOLI)—Progresu konstrusaun fíziku armazén liuhosi projetu Programa Dezenvolvimentu Integradu Munisipál (PDIM) atu rai stoke ai-moruk ba Servisu Saúde munisípiu Viqueque daudaun ne’e atinje ona 57,38%.
“Projetu ida-ne’e ninia durasaun ramata iha dezembru 2023, maibé bainhira projetu ne’e la ramata iha tinan ida-ne’e, ninia orsamentu sei lori ba tinan 2024 hodi responde projetu ne’e,” Diretór PDIM Viqueque, Domingos de Carvalho Monteiro, relata ba Agência Tatoli, iha Administrasaun Viqueque, tersa ne’e.
Tuir Diretór, empreza sira bainhira kaer projetu ladun jere tempu ho di’ak tanba konstrusaun fíziku ninia balansu ladún la’o.
“To’o tinan ramata maka projetu seidauk hotu, osan sei mosu dívida. Tanba ne’e, Sekretáriu munisípiu no Diretór Finansa mós akompaña hodi introdús ba empreza atubele kompreende liafuan extende ba implementasaun projetu sira,” nia akresenta.
Notísia relevante : PDIM avalia implementasaun projetu haat iha Viqueque
Nia dehan, kapasidade empreza iha munisípiu Viqueque jere tempu ba implementasaun projetu sira la tuir durasaun kontratu.
“Projetu ne’e ho durasaun fulan-neen, maibé sira hanoin maka extende. Ami simu orientasaun hosi Diresaun PDIM nasionál katak projetu sira tenke hotu iha tinan 2023 nia laran. Maibé, ha’u konfirma empreza no halo komparasaun kada munisípiu, emprezáriu sira kapasidade la hanesan, emprezáriu Viqueque ita ko’alia implementasaun projetu tarde maka barak tanba sira hatene manán projetu, maibé la hatene jere tempu,” Diretór dehan.
Maski nune’e, PDIM Viqueque sei kontinua akompaña empreza implementa konstrusaun projetu hodi garante kualidade.
Projetu PDIM iha Viqueque iha haat kompostu hosi konstrusaun armazén rai ai-moruk, hahú obra iha fulan-abríl to’o outubru 2023 ho duransaun implementasaun projetu fulan-neen, ho responsável projetu Bela Lari unip, Lda, no kustu projetu $144.286.
Progresu fíziku reabilitasaun rezidénsia Administradór munisípiu Viqueque atinje 23,24%, gasta orsamentu $470.225,91, responsável projetu empreza Peaceful unip Lda, kontratu hahú konstrusaun loron 07 jullu 2023 no ramata 31 janeiru 2024.
Projetu konstrusaun edifísiu foun ba postu administrativu Ossu no moru haleu ho kustu $242.358,65, progresu kontrusaun fíziku 21,04%, responsável hosi empreza Dira Nova unip lda, kontratu hahú konstrusaun loron 17 abríl 2023 no ramata 31 outubru 2023.
Projetu konstrusaun foun edifísiu Eskola Ensinu Báziku Filiál (EBF) Cailaquebabo iha postu Lacluta ho kustu $109.908,10, responsável hosi empreza Mot-Quilim unip Lda, kontratu hahú konstrusaun loron 07 jullu 2023 no ramata 31 janeiru 2024.
Jornalista : Vitorino Lopes da Costa
Editora : Julia Chatarina
