Manán iha eleisaun suku, Fabiana Ribeiro sei habadak burokrasia atendimentu iha Bahú
BAUCAU, 17 outubru 2023 (TATOLI) – Kandidatura feto xefe suku Bahú, postu Baucau Vila, promete bainhira manán iha eleisaun lideransa komunitária sei habadak burokrasia atendimentu iha suku no fasilita informasaun ba komunidade kona-ba asaun governu nian ho transparante.
Kandidatura xefe suku Bahú, Fabiana Ribeiro, esplika, atividade eleisaun suku demokratiku tebes fó oportunidade ba feto atu barani foti desizaun iha situasaun ne’ebé enfrenta nune’e sai korajen atu dedika-aan ba povu bainhira hetan konfiansa.
“Tempu ida-ne’e oportunidade ba ami feto sira atu direitu ka knaar atu envolve aan iha kompetisuan eleisaun ne’e,” Fabiana Ribeiro hateten iha sede suku Bahú, Vila Antiga, segunda ne’e.
Fabiana Ribeiro hosi aldeia Ana-Ulo deside kandidatura ba xefe suku Bahú hodi hetan apoiante pursentu ida tuir kritéria hamutuk ema na’in-154, maibé submete de’it lista naran apoiante ba meza asembleia suku hamutuk 72.
Vizaun ba xefe suku hanesan promove komunidade atu envolve aan iha atividade suku, fó oportunidade ba ema hotu hanesan feto, mane, ema ho defisiénsia no labarik atu asesu livremente tanba konsidera hanesan povu nian liuliu transparante.
Fabiana iha misaun reprezenta komunidade Bahú atu trasa proposta kona-ba problema suku hanesan halo identifikasaun liuhosi diálogu, observa hodi akumula opiniaun hotu ligadu ho planu proposta ne’ebé sei trasa hanesan submete ba liña ministeriál no autoridade munisípiu.
“Ha’u hanesan jestora atu jere oinsá ema hotu-hotu partisipa iha atividade suku,” Fabiana Ribeiro akresenta.
Fabiana Ribeiro konsidera, sai lideransa tenke transparante liuliu kona-ba informasaun ne’ebé iha suku liuhosi atendimentu di’ak no lalais no habadak burokrasia iha suku kona-ba atendimentu sira.
Tanba tuir nia, atendimentu ne’e sai pontu prinsipál ba komunidade sira iha área rurál
Programa prioridade ba feto mak kria formasaun, akumula problema hotu nune’e iha vontade atu dezenvolve aan hanesan kria grupu feto atubele kria programa hanesan agrikultura, turismu no hakiak animál.
Fabiana Ribeiro, promete sei hato’o programa refere liuhosi maneira tama-sai uma, fahe brosura direita ba komunidade inklui fahe iha mídia sosiál hanesan facebook no whatsapp nune’e bele konvense komunidade iha eleisaun suku fulan ne’e.
“Ha’u prontu simu rezultadu, kolega balun mak lidera, ha’u prontu atu ajuda bainhira presiza,” Fabiana Ribeiro argumenta.
Eleisaun suku Bahu tinan-ne’e hamutuk kandidatura na’in-neen komposta Eleuteru Boavida, Fabiana Ribeiro, José Gusmão, Faustino Saores, Manuel Gusmão no Miguel da Costa.
Suku Bahu hamutuk totál elitór 7.220 hosi aldeia lima; Ana-Ulo, Boile, Lamegua, Macadae no Ro-Ulo.
Jornalista : Natalino Belo
Editór : Evaristo Soares Martins
