MDRHK realiza enkontru mini Komisaun Revizaun Orsamentu 2024
DILI, 17 outubru 2023 (TATOLI) – Ministériu Dezenvolvimentu Rurál no Habitasaun Komunitária (MDRHK), realiza enkontru Mini Komisaun Orsamentu hodi konsolida planu, programa no atividade ne’ebé sei sai orsamentu iha tinan 2024.Realizasaun enkontru Mini Komisaun Orsamentu, ne’e bazeia ba despaixu Ministru MDRHK Mariano Assanami Sabino ho objetivu hosi reuniaun ne’e atu konsolida no diskute planu, programa, atividade ne’ebé sei sai orsamentu iha tinan 2024.
Sorumutu ne’e atu prepara mós materiál téknika hodi ba aprezenta Komisaun Revizaun Orsamentu iha Ministériu Finansas (MF) iha tempu besik.
Preparasaun submisaun orsamentu 2024 ba MF hosi MDRHK ho senáriu tolu, hodi kumpre pakote, proposta orijinál no proposta media.
Iha okaziaun ne’e, Ministru MDRHK, Mariano Assanami Sabino, konsidera ministériu refere nu’udar ministériu foun ida ne’ebé foin eziste depois tinan 20 konstrusaun nasaun.
Ministériu Dezenvolvimentu Rúral hanesan Ministériu zona, la’os Ministériu setorál hanesan, Edukasaun, Saúde, no Agrikultura, maibé Dezenvolvimentu Rúrál ne’e zona katak urbana ho rurál.
“Dezenvolvimentu iha área Rurál la’os ita mesak mak halo, dezenvolvimentu lubuk ida la’o tiha ona, Edukasaun, Saúde, Agrikultura, Estrada Rurál la’o tiha ona, ema halo ona buat lubuk ida, maibé ita mak ministériu ne’ebé koordena, organiza no sinkroniza atividade hotu iha área rurál ne’ebá”, Ministru MDRHK Mariano Sabino dehan liuhosi komunikadu ne’ebé Agência TATOLI aesu hosi media Vise-Primeiru Ministru Assanami, ohin.
Atu garante funsionamentu ministériu nian hodi implementa polítika no programa hodi dezenvolve povu nia moris mak funsionáriu ministériu nian hothotu tenke iha responsabilidade, respeitu malu, disiplina no dignifika malu hodi presta servisu ne’ebé di’ak ba bem estar povu no nasaun.
Iha okaziaun ne’e, Xefe Gabinete MDRHK, Mariano Fernandes Xavier Malik, agradese no kompromete sei hatudu prestasaun servisu ne’ebé di’ak hamutuk ho funsionáriu tomak ministériu nian, nune’e bele lori bem estar ba ema hotu.
“Iha ne’e ha’u atu hato’o de’it liafuan badak kona-ba atividade loron tolu ne’ebé mak halo ona atu haree kona-ba Planu Orsamentu Ministériu nian ba iha 2024, ami hamutuk konsege formula orsamentu, formula Planu Programa ba Dezenvolvimentu Rúral nian hetan asisténsia hosi Asesor sira”, hatete Malik iha komunikadu ne’e.
Iha atividade loron tolu ne’e, ekipa diskute orsamentu ministériu nian ne’ebé atribui hosi MF hanaran pakote fiskál MDRHK iha tokon $1.3, ekipa halo ezersísiu iha orsamentu tokon $1.3 ba kategoria ne’ebé tuir sistema finansa nian.
Halo ezersísiu mós ba orsamentu adisionál tokon $10, haree ba atividade ministériu nian katak labele kobre hosi tokon $1.3, entaun halo ezersísiu ba tokon $10 atu bele kobre de’it ba atividade iha tinan oin.
Senáriu seluk mak nafatin mantein pakote ne’ebé MDRHK submete ba MF tokon $23, hosi sesaun ida-ne’e define atribuisaun ba diresaun ida-idak tuir tarefa servisu ba nesesidade diresaun jerál ida-idak nian.
Hosi atividade ne’e, aproveita rona aprezentasaun hosi tékniku sira no atividade ne’e hanesan meiu ida hodi hametin unidade, amizade hosi funsionáriu hothotu atu oinsá fó hanoin ba malu nune’e bele halao ministériu ida-ne’e iha lideransa Ministru Dezenvolvimentu Rúral Mariano Assanami Sabino Lopes nia orientasaun.
Jornalista: Hortencio Sanchez
Editór : Zezito Silva
