PNTL Baucau detein joven-rua tanba tenta tuda postu seguransa
BAUCAU, 17 outubru 2023 (TATOLI) – Komandu Polísia Nasionál Timor-Leste (PNTL) munisípiu Baucau detein joven nain-rua ne’ebé tenta tuda postu seguransa.
Komandante PNTL Baucau, Superintendente Xefe, Antoninho Mauluta, esplika, kazu refere akontese bainhira joven na’in-rua hamutuk ho kolega balun ho kondisaun lanu baku kondutór mikrolete purvolta oras 16:00 lorokraik iha área Vila Nova iha loron 16 outubru.
“Sira mai tenta tuda membru balun iha casa seguransa nian nune’e liuhosi forsa rápida detein iha sela,” Komandante PNTL Baucau hateten iha Vila Nova, tersa ne’e.
Suspeitu na’in-rua refere ho inisiál EG (22), hela fatin bairru Rakalele, aledeia Lutumutu, suku Tirilolo no JF (19), hela fatin bairru Rakalele, aldeia Lutumutu, suku Tirilolo, postu Baucau Vila.
Tuir kronolojia, vítima keixa ba PNTL Baucau nune’e liuhosi membru intervensaun rápida halo prevensaun hodi asegura joven na’in-rua ne’e nune’e hetan reasaun hodi halo atake iha postu seguransa iha komandu PNTL Baucau.
PNTL Baucau sei kontinua prosesa no tuir investigasaun posibilidade suspeitu sei aumenta nune’e no tuir planu lokraik ne’e sei kontinua ba Ministériu Públiku hodi prosesa iha Tribunál Distritál Baucau.
“Ita konsidera krime fragante delitu tanba bainhira sira halo atake ita kaer kedas iha fatin,” Mauluta akresenta.
Jornalista : Natalino Belo
Editór : Evaristo Soares Martins
