Profisionál saúde iha Manatuto menus husu aumenta
DILI, 17 outubru 2023 (TATOLI) – Diretór Servisu Saúde Manatuto, Mateus Vicente Correia, hateten profisionál saúde iha Munisípiu Manatuto menus ne’ebé afeta ba atendimentu pasiente sira.
“Ita-nia profisionál saúde hamutuk 30 de’it, entaun la kobre hotu ba postu saúde 19 no sentru saúde neen iha Manatuto, tanba balun muda tiha ba Dili, balun eskola, husi ne’e ami koloka ba postu saúde no sentru saúde la sufisiente”, Mateus Vicente Correia informa ba TATOLI via telephone, ohin.
Nia esplika, hosi postu saúde ne’ebé mak profisionál saúde la iha mak hanesan Postu Saúde Tasi fatin, Postu Saúde Fatumakerek no Postu Saúde Labubu.
“Postu saúde sira ne’ebé médiku, parteira enferemeiru la iha ne’e ami halo de’it mobile klínika kada fulan, ami-nia ekipa saúde husi Laklo Vila ba halo tratamentu saúde iha postu sira ne’ebé profisionál saúde la iha, entaun ida-ne’e problema boot ba ami”, nia afirma.
Nia esplika, durante ne’e SSMM halo ona proposta ba Ministériu Saúde atu aumenta rekursu umanus iha Munisípiu Manatuto maibé to’o agora seidauk iha resposta.
“Ha’u halo ona proposta dezde Governu da ualu nian, maibé to’o agora seidauk iha resposta ba ha’u no iha Governu da-sia mós ha’u hato’o iha konsellu konsultivu maibé seidauk iha resposta hotu nune’e sei iha mudansa ba estrutura, entaun difikulta ba ami iha munisípiu”, nia haktuir.
Nia subliña, husi proposta anteriór ne’ebé mak Munisípiu Manatuto presiza mak médiku 10, parteira na’in neen, enfermeiru na’in-hitu, tékniku aliadu na’in-10, husi proposta ne’e kontinua evalua fila fali iha Governu da-sia atu haree ba probelma iha Manatuto maibé to’o agora seidauk.
“Bainhira nasionál dada hotu médiku sira husi munisípiu ba Dili hodi asegura servisu iha nasionál, entaun ha’u propoin katak bele apoiu rekursu umanus seluk atu bele halo fali atedimentu iha ne’e, maibé iha momentu ne’e sira seidauk resposta mai ha’u entaun ida-ne’e mak problema ba ami”, nia relata.
Postu saúde iha Munisípiu Manatuto hamutuk 19, husi ne’e Postu Saúde Kribas, Postu Saúde Rembor, Postu Saúde Hiliheu, Postu Saúde Hatukona, Postu Saúde Labubu, Postu Saúde Ohorai, Postu Saúde Ilimanu, Postu saúde Lei, Postu Saúde Manelima, Postu Saúde Sanan Nain, Postu Saúde Funar, Postu Saúde Fatumakerek, Postu Saúde Salau,Postu Saúde Manufahi kiik, Postu Saúde Tasi fatin, Postu Saúde Mane haat, Postu Saúde Bariki, Postu Saúde Aimeta laran no Postu Saúde Kairui.
Husi Sentru Saúde neen iha Manatuto mak hanesan Manatuto Vila, Sentru Saúde Laleia,Sentru Saúde Laklo,Sentru Saúde Laklubar, Sentru Saúde Soibada no Sentru Saúde Natarbora.
Jornalista : Felicidade Ximenes
Editór : Zezito Silva
