iklan

NASIONÁL, EKONOMIA, HEADLINE

Timor-Leste konklui ona negosiasaun adezaun bá OMK

Timor-Leste konklui ona negosiasaun adezaun bá OMK

Imajen: Vise PM no Ministru Koordenadór Ekonomia no Ministru Turizmu no Ambiente

DILI, 16 outubru 2023 (TATOLI)-Repúblika Demokratika Timor-Leste (RDTL) hahú tama ona iha hakat finál hodi sai nu’udar membru ba Organizasaun Mundiál Komérsiu (WTO, sigla inglés) hafoin aplika ba organizasaun mundiál ne’e iha tinan 2016.

Governu Timor-Leste hahú aplika atu tama ba Organizasaun Mundiál ba Komersiu (OMK) iha fulan-novembru, tinan 2016, no iha loron 7 dezembru 2016, Konsellu Jerál estabelese grupu traballu hodi ezamina aplikasaun governu Timor-Leste nian ba OMK, iha artigu XII husi Akordu Marraquexe ne’ebé institui ba OMK.

Grupu traballu hahú hasoru malu iha loron 1 outubru 2020, 29 jullu 2021, 29 abríl 2022, 30 setembru 2022, no 20 abríl 2023 liuhusi lideransa (Chairman) Rui Macieira husi Portugal.

Iha loron Sesta 11 outubru 2023, grupu traballu ne’ebé lidera husi Xefe Negosiadór, atuál Vise Primeiru-Ministru, Ministru Koordenadór ba Asuntu Ekonómiku, Ministru Turizmu no Ambiente, Francisco Kalbuadi Lay ne’ebé akompaña husi Ministru Komérsiu no Industria, Filipus Nino Pereira no Ministru Transporte no Komunikasaun, Miguel Manetelo realiza enkontru ho Estadu membru OMK sira iha kuartel jerál OMK iha Genebra, Suísa.

Estadu membru OMK sira elojia Timor-Leste nia empeñamentu forte ho traballu tékniku hodi ensera negosiasaun adesaun ba OMK. Timor-Leste subliña nia determinasaun ba rezolve kestaun téknika pendente sira, promulga ona projetu lei pendente sira, no hela de’it atu asina akordu bilaterál ho Indonézia no Thailandia iha fulan ida ne’e nia rohan ne’ebé hatudu Timor-Leste iha dalan ne’ebé loos no atu konklui ona nia prosesu adesaun ba OMK iha konferénsia ministeriál (MC13) iha fevereiru 2024.

Lidera husi embaixadór Portugal, Rui Macieira, Grupu Traballu fó boas-vinda ba delegasaun nivel a’as husi Dili, lidera husi Vise-Primeiru-Ministru, Sri Francisco Kalbuadi Lay ne’ebé resentamente nomeadu nu’udar Xefe Negosiadór ba OMK.

Embaixador Macieira nota katak, grupu traballu ba dala ne’en la’o durante tinan tolu ona hafoin enkontru dahuluk iha outubru 2020.

“Ha’u impresionadu ho progressu lalais tebes ne’ebé konsege halo iha grupu traballu ne’e. Sekretariadu OMK hatete mai ha’u katak, ida ne’e nu’udar progressu ne’ebé la’o lalais liu entre adesaun hamutuk 24 ne’ebé oras ne’e sei la’o hela. Ida ne’e tanba serbisu maka’as no komprimisu ekipa negosiál Timór nian no apoiu kooperasaun husi membru sira hotu,” Embaixadór Macieira hateten haktuir liuhosi nota ne’ebé Agência Tatoli asesu, segunda ne’e.

Enkontru grupu traballu ba dala-VI ne’e hala’o iha iha Kuartel Jerál OMK iha Genebra, Suísa, iha sesta (11/0/2023, hosi embaixadór Portugal, Rui Macieira.

Embaixador Macieira afirma katak, Timor-Leste oras ne’e iha ona dalan ne’ebé loos atu sai nu’udar membru OMK, ho elementu maiór savi sira iha negosiasaun adezaun rezolvidu no konkorda malu tiha ona.

Nia hatutan, envolvimentu direta no fasilitasaun husi nivel polítiku husi Diretora-Jerál OMK, Ngozi Okonjo-Iweala, durante negosiasaun tama iha faze krítika iha fulan hirak ikus nia laran. Semana kotuk, nia simu vizita Prezidente Repúblika, José Ramos-Horta mai iha sede OMK, oferese nia apoiu no sujestaun atu finaliza lalais prosesu adezaun ne’e iha enkontru ministerial (MC13), no rekomenda ba Sekretariadu OMK atu hala’o serbisu hamutuk ho ekipa traballu husi Dili hodi prepara ba pós-adezaun.

Xefe Negosiadór Timor-Leste ba adezaun OMK, Francisco Kalbuadi Lay hateten, esforsu maka’as tebes hala’o tiha ona atu adapta no halo progresu konstrutivu, kreativu atu mantein Timor-Leste nia dalan loos ba adezaun ne’ebé loos ho lalais.

“Ha’u espera katak, ita boot sira hotu konkorda ho ha’u katak, Timor-Leste agora iha ona hakat finál ba adezaun OMK nian. Ha’u fiar katak, grupu traballu sira sei iha pozisaun atu adopta pakote adezaun iha tempu badak hodi hein Konferénsia Ministeriál OMK nian tuir mai,” Xefe Negosiadór hateten.

Vise-Primeiru-Ministru ne’e relata, kona-ba progresu substánsia sira alkansadu ona iha negeosiasaun bilaterál sira ba asesu merkadu ho membru sira, ho negosiasaun hotu termina ona, no asina akordu sei akontese molok fulan ida ne’e ramata.

Xefe Negosiadór, nota katak, Timor-Leste iha komprimisu boot atu hakat liu saida mak Nasaun Menus Dezenvolvimentu (Leat Developed Countries) sira hakarak nu’udar ilustra iha komprimisu ambisiozu lubuk ida ne’ebé prontu atu hala’o, inklui adezaun ba Akordu Teknolojia no Informasaun no Akordu Expansaun Teknolojia no Informasaun. Projetu kronograma kompromisiu korespondente programadu tiha ona hodi konsidera formalmente ba aprovasaun husi Komite Teknolojia no Informasaun iha loron 19 outubru 2023.

Iha parte lejislativa nian, Vise Primeiru-Ministru informa ba Estadu membru OMK katak, maske iha mudansa ba governasaun iha tinan kotuk, lejizlasaun sira ne’ebé presija atu durante periodu adezaun no pós-adezaun kontinua elabora no adopta, ho respeitu ba prazu akordu sira.

Biban hanesan, Vise-Diretór OMK, Xiangchen Zhang impresionadu tebes ho disponibilidade Governu Timor-Leste hodi adere (ba OMK, ne’ebé nu’udar hakat ida krítiku tebes ba adezaun ba Asosiasaun Nasaun Sudeste Asiátiku (ASEAN, sigla ingles).

“Ha’u hanoin ida ne’e mak ami temi, buat furak mai ho nia parseiru sira,” nia hateten.

Zhang relembra katak, Diretora-Geral OMK, Ngozi Okonjo-Iweala koloka adezaun nasaun LDC rua Timor-Leste ho Comoros nu’udar prioridade, no hato’o instrusaun ba Sekretariadu OMK atu fasilita rezolve adezaun nu’udar rezultadu MC13 la’o dala ida ho prosedimentu ne’ebé hato’o husi Ministru sira iha MC12.

Membru sira apoiu objetivu terminasaun adesaun MC13 ne’e, no rekoñese esforsu signifikativu sira ne’ebé hala’o husi Timor-Leste durante tinan tolu ikus. Sira ein-faze katak, Timor-Leste foku nafatin hodi finaliza prosesu ne’e, posibilita nasaun ne’e atu atinje progresu ne’ebé estavel, no subliña importansia nasaun menus dezolvimentu sira atu tama ba organizasaun ne’e.

Iha ámbitu ne’e, Vise Primeiru-Ministru, Kalbuadi Lay asina akordu bilaterál ho Estadu Unidu Améika (EUA) iha embaixada EUA nian iha Genebra, Suísa.

“Estadu Unidu Amerika ho kontente hakarak anunsia konkluzaun negosiasaun bilateral ba asesu merkadu ho Timor-Leste, nu’udar parte esforsu Timor-Leste nian atu adere ba Orgamizasaun Mundial Komersiu. Timor-Leste solisita ba adezaun OMK iha tinan 2016 no komesa serbisu ativamente hodi atinji objetivu ne’e iha tinan 2020. Kompromisiu forte Timor-Leste nian iha avansa negosiasaun permite progresu sira signifikativu tebes iha tinan rua ikus ne’e, inklui konkluzaun ba ami nia akordu bilateral,” Embaixadora no Reprezentante Komersiu Estadu Unidus Amerika nian iha Genebra, Katherine Tai hateten.

EUA hein katak, sei serbisu hamutuk ho Timor-Leste no ho nasaun membru OMK sira seluk, medida sira ne’ebé Timor-Leste esforsu hodi avansa mak atu kompleta nia adezaun. Paralelamente prosesa adezaun ba OMK, Timor-Leste mós oras ne’e esforsu aan hela hodi sai membru ASEAN.

Antes ne’e governu Timor-Leste, finaliza tiha ona akordu bilaterál sira kona-ba asesu ba merkadu ho nasaun membru OMK hamutuk 7 hanesan Austrália, Nova Zelándia, Japaun, Kambodia, Uniaun Europeia, Philipina no Kanada. Nune’e, iha fulan hirak oin mai, Timor-Leste ho dilijente sira sei esforsu hodi finaliza kestaun pendente sira hodi fornese dokumentu adisional inklui finaliza mós akordu bilateral ho nasaun membru OMK sira seluk mak hanesan Indonézia no Tailándia molok fulan outubru ne’e ramata.

Jornalista : Antónia Gusmão

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!