CNRT aseita pedidu FRETILIN, hili kandidatura úniku ba Komisáriu CAC
DILI, 18 outubru 2023 (TATOLI) – Xefe Bankada Partidu CNRT iha Parlamentu Nasionál Duarte Nunes, aseita ho pedidu hosi FRETILIN atu hili kandidatu úniku ba Komisáriu Komisaun Anti Korupsaun (CAC-sigla portugés).
“FRETILIN husu atu konsensu, agora ba plenária ne’e votu sekretu, ne’e mak sira prefere Governu haruka de’it kandidatura ida de’it mak mai, hasai tiha ida, atu iha votasaun hothotu vota de’it ba kandidatura úniku ne’e”, Deputadu Duarte Nunes dehan ba jornalista sira iha Parlamentu Nasionál, ohin.
Tanba ne’e, CNRT ko’alia ona ho Vise Ministru ba Asuntu Parlamentár Aderito Hugo da Costa hodi lori fila ba Konsellu Ministru no deside kandidatura ida hafoin lori hikas ba Parlamentu Nasionál.
“Bainhira Governu haruka kandidatura ida mai, tuir FRETILIN nia hakarak dehan ita ba vota, ita ba vota atu hili ona Komisáriu CAC nian hodi bele hala’o servisu”, nia haklaken.
Antes ne’e, Xefe Bankada FRETILIN Aniceto Guterres deklara ona, FRETILIN prontu halo konsensu ho CNRT hodi hili Komisáriu CAC maibé prefere ho kandidatura ema na’in ida no labele na’in rua.
“Ami hetan tiha ona entendimentu ba kandidatu ida no ida seluk ne’ebé la hetan apoiu di’ak liu retira, kandidatu sé, naran saida, ha’u labele pronunsia sai”, nia hateten.
Kandidatura rua ne’ebé antes ne’e, Governu hato’o ba Parlamentu Nasionál mak Sérgio de Jesus Fernandes da Costa Hornai no Rui Pereira dos Santos.
Atu priénxe korum bá eleisaun Komisáriu CAC tenke atinje 2/4 ka ruak baluk haat, prezensa deputadu sira-nian signifika deputadu sira tenke marka prezensa ema na’in-42+1.
Jornalista: Hortencio Sanchez
Editór : Zezito Silva
