DILI, 18 outubru 2023 (TATOLI) – Embaixadór Japaun iha Timor-Leste, Tetsuya Kimura, hamutuk ho Organizasaun Naun Governamentál Japoneza Frontline komemora loron internasionál inan-isin rua no memoria mate infantil iha postu Gleno-Ermera, ne’ebe organiza husi autoridade munisipál no profisinál saúde Ermera.
Iha komemorasaun ne’e hala’o mós kampaña loron ikus kona-ba saúde reprodutiva, materna no infantil ne’ebé hahú ona husi loron 4 setembru ho objetivu atu aumenta konsiénsia kona-bá saúde reprodutiva ba populasaun.
“Governu Japaun apoia ho fundu no hahú ho programa iha munisipiu Ermera hodi hadi’ak servisu saúde reprodutiva no sensibilizasaun popuplasaun sira iha Munisípiu Ermera desde tinan 2021. Frontline hili Ermera nu’udar projetu fatin tanba taxa mortalidade infantil aas no mate durante isin-rua ka tuur-ahi”, refere nota ne’ebé Agência TATOLI asesu.
Tuir dadus iha tinan 2022, akontese mate infantil ho totál 55 no labarik mate durante partu totál 19 iha Ermera.
Iha tinan 2021, Frontline konstrui ona Uma Maternidade iha Sentru Saúde Guisaduru atu reduz mortalidade maternal no infantil atu hadi’ak asesu ba servisu saúde populasaun.
Ho konstrusaun ne’e, iha tinan 2022, inan isin-rua hamutuk 288 mak partu ona no inan isin-rua hamutuk 495 mak simu ona atendimentu pré-natal.
Governu Japaun mós oferese Frontline ho aparellu ultrassonografia portáteis 29 ba postu saúde sira iha Ermera no Institutu Nasionál Saúde (INS), nunue’e mós formasaun ultrassonografia obstetrika dahuluk iha Timor-Leste.
Liuhosi estabelesimentu frontline iha Ermera ne’e konsege kapasita ona profisionál saúde na’in-25 no na’in 10 husi sira ne’e mak sertifikadu ona nu’udar profissionál ultrassonografia obstétrika no jinekolójika husi INS.
Ho projettu hosi Governu Japaun durante tinan tolu ne’e inan isin-rua hamutuk 4.000 sei hetan asesu ba ultrasonofrafia obstétrika nian, profisionál saúde na’in-35, médiku na’in-100 liu sei hetan koñesimentu kona-ba isin rua no tuur-ahi ho seguru.
Enkuantu, Populasaun mak sei hetan 16.000 hodi hasa’e sira nia sensibilizasaun ba saúde reprodutiva inklui importánsia atu simu ezame ultrassonográfiku.
Iha eventu ne’e, Embaixadór Japaun husu ba Governu no Institutu Nasionál Saúde atu utiliza di’ak ho másimu uma maternidade, mákina portáteis ultrasonografia nian, no aplika di’ak formasaun ultrasonográfia obstétrika ba iha tinan naruk.
Jornalista: Jesuína Xavier
Editór : Florencio Miranda Ximenes
