VIQUEQUE, 18 outubru 2023 (TATOLI)—Projetu United Nations Development Programme (UNDP) ba reabilitasaun irrigasaun Belia iha suku Matahoi, postu Uatulari no Uani Uma iha postu Uatucarbau, munisípiu Viqueque daudaun ne’e kontinua la’o no hatudu progresu maski hasoru difikuldade.
“Progresu implementasaun projetu UNDP ba reabilitasaun irrigasaun Belia 1 no Belia 2 daudaun atinje 39,43%, enkuantu irrigasaun iha Uani-Uma foin atinje 10%. Antes ne’e, ekipa téknika hosi UNDP halo levantamentu, maibé empreza implementadór hasoru hela kestaun sosiál tanba autoridade lokál balun ladún kontribui di’ak,” Diretór Planu Dezenvolvimentu Integradu Munisipál (PDIM) Viqueque, Domingos Monteiro de Carvalho, hateten ba Agência Tatoli, iha Administrasaun Viqueque, kuarta ne’e.
Empreza responsável ba reabilitasaun irrigasaun kontrata badaen ne’ebé hanesan natar-na’in.
“Sira ladún kontribui no projetu ne’e iha ninia kritériu feto tenke envolve maibé iha Viqueque feto bainhira serbisu hanesan konstrusaun ne’e moe. Projetu agora la’o neineik tanba planeamentu la’ós hosi munisípiu, maibé orsamentu tama ba aprozionamentu munisípiu Viqueque maka loke konkursu tuir matadan husi PDIM.
Notísia relevante : PDIM avalia implementasaun projetu haat iha Viqueque
Tuir Diretór, iha implementasaun projetu hamosu konfuzaun tanba UNDP maka foti levantamentu maibé PDIM mak halo monitorizasaun. Kestaun seluk, iha prosesu levantamentu dadus ba irrigasaun ladún detallu hodi prejudika ba empreza implementadór sira tanba dadus la tuir kontratu iha Bill of Quality (BoQ) kontratu.
“Ho difikuldade no dezafiu sira-ne’e, ami sei relata ba UNDP tanba sira maka na’in ba projetu, ami hanesan implementadór iha munisípiu tuir regra aprovizionamentu,” nia relata.
Nune’e, PDIM sei aprezenta ba parseiru sira atu ba futuru implementasaun projetu sira hanesan ne’e bele hadi’a hodi labele difikulta tan iha implementasaun projetu sira ne’ebé mai hosi parseiru sira.
Irrigasaun Belia 1 no Belia 2 fornese bee hosi mota Belia ba natar ektare 442, ho kustu hosi parseiru UNDP $74.948,96, reabilita hosi empreza Saerubu unip, Lda, ne’ebé daudaun badaen sira kontinua halo reabilitasaun.
Irrigasaun fornese bee hosi mota Belia ba natar ektare kuaze 350, lokaliza iha suku Uani-Uma, postu Uatucarbau, ho kustu orsamentu mai hosi parseiru UNDP $112.051,72, reabilita hosi empreza Macamat unip, Lda.
Jornalista : Vitorino Lopes da Costa
Editora : Julia Chatarina
