BAUCAU, 19 outubru 2023 (TATOLI) – Asosiasaun Defisiénsia Fiar Timor-Leste (ADFTL), kinta ne’e, atribui sertifikadu kursu lian Inglés ba formandu hamutuk nain-15 iha munisípiu Baucau.
Diretór Ezekutivu ADFTL, José Frederico, esplika, seremónia atribuisaun sertifikadu refere realiza hafoin formasaun lian Inglés durante fulan-neen ne’ebé halao gratuita no lansamentu formasaun lian Korea ne’ebé parte hosi programa ADFTL.
“Bainhira sira hatene ona bele uza oportunidade atu aplika vaga ruma kuandu iha serbisu ruma iha rai-laran no rai-liur,” Diretór ezekutivu ADFTL hateten iha Vila nova, kinta ne’e.
ADFTL atribui ba formandu nain-15 refere simu sertifikadu bazeia ba teste durante formasaun no na’in-10 mak seidauk simu sertifikadu tanba sei tuir ezame nasionál.
Formasaun lian Korea ba defisiente
ADFTL, tuir planu, hafoin lansamentu formasaun lian Korea sei kontinua loke oportunidade ba formandu sira atu halo rejistrasaun partisipante liuliu alvu ba ema ho defisiénsia atu aprende hodi aumenta kapasidade nune’e prepara aan atu kompete iha merkadu traballu iha rai-laran no rai-li’ur.
ADFTL sei koordena ho institusaun relevante hanesan Sekretáriu Estadu Formasaun Profesionál Empregu (SEFOPE) atu hetan akreditasaun sentru formasaun nune’e prosesu estudu informál ne’e bele espande boot liutan.
ADFTL iha formadór na’in-tolu ne’ebé sei hanorin lian Korea no Inglés ba formandu sira durante périodu kursu.
Jornalista : Natalino Belo
Editór : Rafael Ximenes de A. Belo
