Iha ICU trata pasiente 78, óbitu 29
ILI, 19 outubru 2023 (TATOLI) – Hospitál Nasioal Guido Vladares (HNGV) iha Unidade Tratamentu Intensivu (ICU) halo ona tratamentu ba pasiente hamutuk 87, husi ne’e 29 mak mate.
“Tuir dadus ne’ebé mak ami rekolla, hahú husi fulan jullu, agostu no setembru, totál pasiente ne’ebé mak baixa iha ne’e hamutuk 87, kompostu husi fulan jullu 30, agostu 26 no setembru 31, husi númeru ne’e pasiente ne’ebé mak mate ona hamutuk 29 tanba kazu grave”, Médiku Espesialista ICU, Marino dos Santos Pinheiro, dehan ba jornalista sira iha nia fatin Unidade Tratamentu Intensivu (ICU) HNGV, ohin.
Nia informa, husi pasiente 29 ne’ebé mak mate ne’e maioria pasiente sira mai ho infesaun grave, liuliu pasiente sira ne’ebé mak mai ho moras pulmaun no tuberkuloze inklui joven sira ne’ebé mak hetan asidente.
“Sira ne’ebé mak mate ne’e maioria pasiente sira mai ho infesaun grave, liuliu pasiente sira ne’ebé mak mai ho moras pulmaun no tuberkuloze”, nia relata.
Nia esplika, iha ICU ne’e la’os simu de’it moras ho tipu oin ida de’it, maibé iha ne’e akumula pasiente sira ne’ebé mak tama husi sala emerjénsia, iha sala medisina interna no seluk tan, bainhira pasiente sira hetan komplikasaun, entaun baixa iha sala ICU hodi salva sira-nia vida.
“Ami iha ne’e la’os simu moras oin ida de’it, maibé ami simu hotu pasiente sira ne’ebé mak tama husi sala emerjénsia, sala medisina interna no seluk tan, bainhira pasiente sira hetan komplikasaun entaun baixa iha sala ICU hodi salva sira-nia vida”, nia haktuir.
Totál profisionál saúde ne’ebé halao servisu iha unidade ICU hamutuk 15, husi ne’e médiku jerál na’in ualu, espesialista na’in haat, intensivista kubanu na’in rua inklui brigada xina na’in ida.
Jornalista : Felicidade Ximenes
Editór : Zezito Silva
