iklan

BAUCAU

Inan isin-rua la konsumu hahán nutritivu kontribui bebé falta proteína

Inan isin-rua la konsumu hahán nutritivu kontribui bebé falta proteína

Peskizadór DND, Cristovão de Alexander Barros. Imajen Tatoli/Natalino Belo

BAUCAU, 19 outubru 2023 (TATOLI) – Inan isin-rua ne’ebé la konsumu hahán nutritivu hanesan manu-tolun, na’an no ikan, kontribui ba bebé falta proteína.

Ne’e mak rezultadu peskiza ne’ebé fó-sai husi Institusaun Diresaun Nasionál Dezenvolvementu (IDND) kona-ba mudansa hahalok ligadu ho prátika saúde, ne’ebé hala’o iha tinan 2022, ba autoridade lokál inklui serbisu profesionál saúde sira, iha Vila nova, Baucau, kinta ne’e.

“Peskiza ne’e foku liubá saúde adolsente, nutrisaun no ema ho defisiénsia liuliu barreira sira ema nia mudansa hahalok no sosiál,” Peskizadór IDND, Cristovão de Alexander Barros, informa.

Mudansa hahalok, bazea ba rezultadu peskiza, hatudu, maihosi ábitu no kulturál ne’ebé la favorese ba saúde hanesan bandu inan isin-rua labele konsumu hahán nutrisaun kompostu; manutolun, naan, ikan, ne’ebé konsidera laiha proteina ba bebé.

Proteina ne’e, substánsia ida iha ai-han balun ne’ebé halo isin sai boot no forte, n.e. na’an, ikan, mantolun, susubeen.

Tanba ne’e, tuir Peskizadór IDND, “Presiza halo asaun ne’ebé durante ne’e Ministériu Saúde hamutuk ho parseiru dezenvolvimentu sira halo hanesan advokasia no SISKA – Servisu Integradu Saúde Komunitária”.

Bazea ba rezultadu peskiza ne’e, IDND rekomenda mós ba Ministériu Saúde (MS) atu hadi’a fasilita saúde liuliu postu saúde, aumenta rekursu umanu no presiza serbisu hamutuk entre liña ministeriál hanesan hadi’a infraestrutura.

Entretantu, peskiza ne’e alende hala’o iha munisípiu Baucau, inklui mós Covalima, RAEOA (Rejiaun Autónoma Espesiál Oé-Cusse, Ambeno), Dili, Ermera no Ainaro.

Atividade peskiza ne’e foku ba mudansa hahalok sosiál no impaktu ba saúde reprodutiva, materna, adolsente, nutrisaun no ema ho defisiénsia.

Métodu ne’ebé uza iha peskiza ne’e mak kualitativu ho amostra hamutuk ema na’in-224, ne’ebé fahe ba tipu tolu hanesan asaun partisipativu, entrevista no Fokus Grupu (FG) nune’e bele hetan rezultadu hodi reprezenta Timor-Leste.

Notísia relevante:Labarik na’in-13 hosi Baucau sofre má-nutrisaun

Jornalista : Natalino Belo

Editór : Rafael Ximenes de A. Belo

iklan
iklan

Leave a Reply

iklan
error: Content is protected !!