Konstrusaun estrada kilómetru 10 iha Uatulari finaliza ona
VIQUEQUE, 19 outurbru 2023 (TATOLI)—Empreza responsável finaliza ona konstrusaun estrada pakote rua hahú hosi suku Uaitame postu Uatulari to’o suku Uma-Uain postu Viqueque Vila ho naruk kilométru 10.
“Kona-ba konstrusaun estrada pakote rua iha postu Uatulari, ami akompaña empreza tau hotu ona asfáltiku no monta sinais tráfiku sira ba fatin risku. Nune’e ninia prosesu kontrusaun fíziku finaliza 100%,” Diretór Servisu Obra Públika Viqueque, Mário do Rego, informa ba Agência Tatoli, iha postu Viqueque Vila, kinta ne’e.
Nune’e, Servisu Obra Públika Viqueque sei halo inspesaun iha tempu badak.
“Karik halo inspesaun maka hetan buat a’at ruma, ita sei orienta filafali empreza hodi hadi’a tanba iha kontratu manutensaun to’o tinan-ida. Bainhira Governu halo prosesu pagamentu fó uluk 90% hosi pagamentu, enkuantu 10 % hela ba manutensaun durante tinan-ida,” nia akresenta.
Notísia relevante : Empreza hahú teste fui alkatraun ba estrada Uatulari
Inaugurasaun estrada pakote rua ne’e depende ba planu hosi Ministériu Obra Públika (MOP).
“Kona-ba inaugurasaun, ita hein de’it planu hosi Governu, maibé ha’u hanoin tempu badak ita rona ona inagurasaun tanba prosesu konstrusaun fíziku hotu ona,” Diretór Servisu Munisipál tenik.
Nia haktuir, simu informasaun hosi empreza katak iha ema deskoñesidu balun foti subar sinais sira ne’ebé empreza tau iha estrada, ne’ebé loloos ne’e abitante sira tenke asegura.
“Hahalok ne’e ema inmorál maka halo. Ami orienta empreza sira troka fali ona. Oportunidade ida-ne’e ha’u hakarak fó hanoin ba abitante sira atu asegura sinais sira-ne’e tanba sinais ne’e tau hodi fó hanoin mai ita atu la’o karik kuidadu, ita hotu maka sai responsável hodi kuidadu sasán, autoridade lokál no seguransa sira mós tau matan no fó hanoin ba abitante sira labele estraga sasán sira ne’ebé empreza tau iha estrada,” nia hato’o.
Estrada nasionál iha postu Uatulari ho naruk kilómetru 10, ho kustu millaun $8, asina kontratu iha tinan 2017, hosi empreza Hela Mula UNIP toma konta estrada ho naruk kilómetru 5 no Greo UNIP, LDA haree ba estrada kilómetru 5.
Jornalista : Vitorino Lopes da Costa
Editora : Julia Chatarina
