COVALIMA, 19 outubru 2023 (TATOLI) – Sidadaun 58.380 iha postu administrativu hitu iha Covalima seidauk trata sertidaun moris RDTL no billete identidade (BI), informa Diretór Servisu Munisipál Rejistu Notariadu Covalima, António Sarmento.
Husi totál númeru ne’e na’in-46.859 mak seidauk iha sertidaun moris no 11.521 billete identidade.
Ba postu administrativu Suai, sidadaun ne’ebé seidauk trata dokumentu hamutuk 18.713 (seidauk iha sertidaun moris 14.508 no BI 4.205), postu Fohorem hamutuk 3.766 (sertidaun moris 2.977 no BI 789), postu Tilomar 8.091 (sertidaun moris 7.463 no BI 628), postu Fatumea hamutuk 3.251 (sertidaun moris 2.029 no BI 1.222).
Iha postu Fatululik sidadaun ne’ebé laiha dokumentu 2.310 (sertidaun moris 2.079 no BI 231), postu Maucatar 8.495 (sertidaun moris 7.927 no BI 568) no postu Zumalai 13.904 (sertidaun moris 12.207 no BI 1.697).
“Sidadaun husi postu hitu iha suku 30 ne’ebé hetan ona billete identidade hamutuk 25.839”, diretór adianta.
Dirijente ne’e lembra katak Notaridu Munisípiu Covalima hahú trata dokumentu ba sertidaun moris no BI dezde 2005 no serbisu hamutuk ho parseiru Fundu Nasaun Unida ba Infánsia (UNICEF) liuhusi rejistu movel ba labarik ho idade entre 0 no 5.
“Iha 2008, halo rejistu regulár bá iha suku Suai no Camanasa. Iha 2013, halo rejistu iha Eskola Kátolika Ave Maria Suai, Eskola Tékniku Vokasionál Akar-Laran no Eskola Sekundáriu Jerál Suai. Iha 2014, halo rejistu iha suku Maudemo, postu administrativu Tilomar. Iha 2021, halo rejistu online ba sertidaun nasimentu no BI iha Tilomar no Fohorem no iha 2022 rejistu online iha postu Fatumea, Fatululik no Zumalai”, relembra.
Notísia relevante: Rejistu notariadu Covalima “print out” ona sertidaun RDTL 10.161
Jornalista: Celestina Teles
Editora: Maria Auxiliadora
