DILI, 20 outubru 2023 (TATOLI)– Eletricidade de Timor-Leste, Empreza Públika (EDTL, E.P,), hahú hosi janeiru to’o setembru 2023 ne’e, konsege arrekada reseita millaun $38.4 ba konfre Estadu,
“Reseita ne’ebé arrekada hahú janeiru to’o setembru tinan ida ne’e (2023) hamutuk millaun $38,4 ba kofre Estadu. Kompara iha tinan 2022 hamutuk millaun $48,36”, dehan Prezidente Konsellu Administrasaun Eletricidade de Timor-Leste (EDTL, E.P), Paulo da Silva, ba Agência TATOLI iha kna’ar fatin-Dili.
Reseita hirak ne’e, EDTL,E.P rekolla husi venda enerjia, reseita balun husi aluga poste EDTL, servisu ligasaun foun no multa ba ligasaun ilegál.
“Kontribuisaun reseita ba kofre Estadu barak liu mak instalasaun prepagu ne’ebé monta ona uma sira. Uluk ita sosa kontadór prepagu rihun 108, husi totál ne’e ita instala ona kontadór rihun 97”, katak nian.
Nune’e, EDTL kontinua esforsu atu instala kontadór ba iha uma populasaun ladauk hetan, maibé iha primeiru fulan fo liña gratuita no kontinua kontrola ka halo inspesaun atu prevene sidadaun sira dada eletrisidade ilegál.
Notísia relevante: EDTL sei lansa projetu distribuisaun eletrisidade iha aldeia 57
Jornalista: Jesuína Xavier
Editór : Florencio Miranda Ximenes
