BAUCAU, 20 outubru 2023 (TATOLI) –Feto na’in rua hanesan Joana Ribeiro no Maria Perreira da Cruz kandidata aan hodi kompete ho kandidatu mane na’in tolu hanesan Afonso Ribeiro, Angelino Moisés Perreira no João Sarmento, hodi sai Xefe suku Fatulia, Postu administrative Venilale, Munisípiu Baucau.
Eleisaun komunitária ne’ebé sei akontese iha 28 outubru ne’e, Xefe suku atuál, Angelino Moisés Perreira, relata, nia deside re-kandidatura tanba hakarak kontinua dedika aan liuliu ajuda hadi’a moris povu no rai moris-fatin.
“Durante ne’e hanesan xefe suku ita seidauk kobre hotu tanba tempu limitadu nune’e deside re-kandidatura fali atu kontinua buat ne’ebé antes halo ona,” Angelino Perreira informa ba Agência TATOLI iha Vila nova, Baucau, sesta ne’e.
Angelino Perreira hamutuk ho kandidatura nain-haat seluk maihosi Fatulia-oan no deside atu hamutuk asegura pás no estabilidade durante périodu eleisaun komunitária to’o hetan rezultadu.
Kandidatu xefe suku ne’e hetan apoiante hamutuk 130 no submete ona ba meza asembleia suku hodi priense rekezitu pursentu ida hosi tótal eleitór 1.770.
Lideransa suku ne’e husu atu komunidade Fatulia-oan kontribui hodi partisipa másimu iha eleisaun komunitária hodi hili xefe suku no aldeia tanba sei tau-matan direita ba povu iha baze durante tinan-hitu.
“Iha prosesu eleisaun ne’e labele hatun no ko’alia aat malu tanba mesak sidadaun suku Fatulia-oan,” Xefes uku atuál Fatulia, Angelino Perreira akresenta.
Suku Fatulia hamutuk aldeia haat kompostu hosi Bahadato, Osso-uaque, Uai-to-Bono no Uatulia-ana ho tótal populasaun hamutuk 2.721.
Jornalista : Natalino Belo
Editór : Rafael Ximenes de A. Belo
