Governu distribui ona buletin votu livru 18.854 ba munisípiu 13-RAEOA
DILI, 23 outubru 2023 (TATOLI)–Ministériu Administrasaun Estatál (MAE) liuhosi Sekretaraidu Tékniku Administrsaun Eleitorál (STAE), segunda ne’e, distribui ona buletin votu livru 18.854 (18.853,92) ho folla hamutuk 942.696 ba suku 452 iha munisípiu 13 no Rejiaun Administrasaun Espesiál Oé-Cusse Ambeno (RAEOA).
Notísia Relevante: Fazeadamente STAE distribui ona materiál eleisaun suku ba munisípiu sira
Vise Ministériu Administrsaun Estatál, Jacinto Rigoberto, husu ba komunidade atu hola parte iha eleisaun suku me’ebé sei realiza iha 28 outubru 2023 ne’e, hodi hili lideransa komunitária nune’e bele lidera no lori dezenvolvimentu ba suku.
“Tanba ne’e, ohin, halo distribusaun simbolikamente maibé husu atu kuidadu no asegura nune’e bele utiliza iha eleisaun suku nian. Espera katak iha eleisaun suku presiza apoiu hosi entidade hotu-hotu no asegura imparsialidade. Ha’u hakarak depozita konfiansa ba ita hotu no asegura eleisaun ho susesu no di’ak liután,” Vise Ministru ne’e hateten iha serimónia Governu distribui buletin votu ba munsipiu 13 no RAEOA, segunda ne’e.
Hosi númeru ne’e, nia dehan, ba munisípiu Aileu livru hamutuk 689,70, Ainaro iha 1.065,42, Ataúro 170, Baucau hamutuk 2.098,78, Bobonaro 1.611,92, Covalima hamutuk 1.098,56, Ermera 1.900,16, Dili hamutuk 3.547,32, Lautém iha 1.108,84, Liquiça 1.176,98, Manatuto iha 804,24, Manufahi iha 936,02, RAEOA 1.207, 9 no Viqueque hamutuk 1.282,08.
Governante ne’e hateten, eleisaun ne’e la’ós buat foun ida no Timor-Leste mós iha ona esperiénsia liga ho eleisuan nian ne’ebé mak apoiu eleisaun iha nasaun seluk.
“Ita mós hanorin ona eleisaun sira iha nasaun seluk, nune’e ita iha ona esperiénsia ida. Iha eleisaun suku ida-ne’e importante ba ita-nia lideransa komunitária nian. Tanba sira mak besik sira-nia komunidade, sira mak hatene situasaun povu nian iha rurál,” nia dehan.
Sekretariadu Tékniku Administrasaun Eleitorál (STAE), Acilino Manuel Branco, husu ba parte hotu ne’ebé mak sei simu no akompaña materiál eleisaun suku (buletin votu) ne’e tenke ho kuidadu no asegura to’o ho di’ak no susesu ba eleisaun komunitária nian.
“Presiza ita hotu nia kontribuisaun ba eleisaun suku nian, nune’e ohin ita atribui materiál ba munisípiu sira hotu no husu ba parte hotu atu asegura no tenke susesu,” nia dehan.
Posibilidade hakat ba segunda ronda
Entretantu Vise Prezidente Komisaun Nasionál Eleitorál (STAE), Domingos Barreto, hateten ohin atribui buletin votu ba munisípiu sira no hosi totál kompetente ba lideransa komunitária ne’e hamutuk 2.117.
“Ida-ne’e posiblidade hakat ba segunda ronda, nune’e husu ba entidade hotu-hotu liuliu ba parte seguransa atu fó seguransa ba eleisaun suku ne’e tanba ema barak mak kompete. Nune’e, atu antesipa konfrontu ka problema ruma iha prosesu eleisaun ne’e,” nia dehan.
Reprezentante Komandante Jerál Polísia Nasionál Timor-Leste (PNTL), Superintedente Xefe, José Soares husu PNTL munisipál sira hotu atu asegura materiál eleisaun to’o iha munisípiu no iha aldeia no suku sira.
“Ha’u apela ba parte hotu atu asegura di’ak hosi fatin ida-ne’e to’o iha munisípiu ho kondisaun di’ak no kompleta. Tanba, ita hotu hatene katak ita-nia kondisaun estrada ladi’ak, Nune’e, viajen presiza halo distánsia nune’e labele mosu problema hanesan antes iha eleisaun uluk liubá,” nia hateten.
Tanba ne’e, tuir nia, presiza halo ezersisiu makaas hodi bele lori materiál eleisaun suku to’o iha fatin destinadu sira, no atu hetan susesu mak fila-fali ba ema ida-idak no presiza hamutuk bele lori susesu ba eleisaun ne’e.
Jornalista : Osória Marques
Editór : Cancio Ximenes
