Halo lei ba membru F-FDTL ne’ebé rezigna aan atu selu fali Estadu
DILI, 23 outubru 2023 (TATOLI) – Komodoro Higino das Neves, afirma presiza halo lei ba membru F-FDTL sira ne’ebé hakarak rezigna aan atu selu fila fali ba Estadu.
“Kazu ida-ne’e, komandu sei deside atu halo lei ida iha future ho objetivu atu garante F-FDTL sira nia servisu katak sé mak deside rezigna aan tan baruk, nia tenke selu fila fali Estadu nia osan, hahú hosi nia hakna’ar aan iha F-FDTL”, Komodoro Higinio das Neves, dehan iha serimónia parade militár ba rezignasaun membru F-FDTL iha Komponente Navál segunda ne’e.
Deklarasaun ne’e sai bainhira membru FALINTIL-Forsa Defeza Timor-Leste (F-FDTL) hosi Komponente Navál ho naran Julio Garcia Pinto, tama F-FDTL iha 2009 ho númeru identifikasaun 20500901, Postu Cabo, deside rezigna aan hosi Instituisaun F-FDTL ho razaun falta hela de’it tanba problema partikulár.
Serimónia rezigna aan ba membru F-FDTL, Julio Garcia Pinto, hala’o iha Baze Komponente Navál ho parade militár ne’ebé prezide direta hosi Komodoro Higino das Neves.
“Membru ne’e nia rezigna aan rasik, tanba ho razaun loroloron falta hela de’it servisu tanba nia iha problema particular, nia feen kaben ameasa hela de’it nia. Nia feen ameasa nia katak ó la mai hamutuk ho ha’u, entaun ha’u husik tiha ó, ho razaun ida-ne’e, nia rona liu nia feen, entaun nia falta beibeik no lorloron ita ba ka’er nia iha uma lori mai, maibé nia kontinua falta nafatin no halo problema beibeik, entaun to’o tempu nia mak deside rezigna aan rasik”, nia haktuir.
Neves revela, joven sira mai atu hatután FALINTIL sira nian mehi, la’os atu mai buka moris di’ak iha instituisaun tanba de’it iha liur la hetan osan.
Jornalista: Natalino Costa
Editór : Zezito Silva
