VIQUEQUE, 23 outubru 2023 (TATOLI)—Organizasaun Naun Govermentál (ONG) Fundasaun K’nua Haberan Komunidade (KHC) hamutuk ho parseiru Permakultura Timor-Leste (PERMATIL) realiza mini akapamentu hodi halo prátika konservasaun bee no rai iha foho lolon aldeia Maroman, suku Uma-Ki’ik, postu administrativu Viqueque Vila, munisípiu Viqueque.
“Ami realiza mini akapamentu ida kona-ba konservasaun bee no rai hamutuk ho joven sira hosi suku Uaitame, Bibileo, Luca no Uma-Ki’ik atu hasa’e koñesimentu, nune’e ba oin bele implementa iha ida-idak ninia aldeia no suku,” Diretór Fundasaun KHC, Agusto Pinto, hateten, hafoin halo abertura atividade iha suku Uma-Ki’ik, segunda ne’e.
Atividade ne’e realiza durante loron-tolu, hahú loron 23 to’o 25 outubru.
Aleinde ne’e, fó kapasitasaun ba joven sira kona-ba konservasaun agrikultura no halo to’os iha rai foho lolon.
“Hosi ativdade hirak ne’e, dahuluk oinsá ita atu satan bee iha tempu udan iha foho lolon sira, nune’e bele uza iha tempu bailoro halo atividade ortikultura. Grupu sira bele apreende halo konservasaun bee hodi uza ba atividade agrikultura to’os hodi sustenta nesesidade família,” nia akresenta.
Notísia relevante : PERMATIL realiza formasaun akampamentu iha Lakufoan ‘restaura fali bee-matan iha fatin alvu’
KHC ba futuru sei kontinua enkoraja abitante sira ne’ebé menus bee hodi kria rasik konservasaun bee atu sira bele asesu.
Iha fatin hanesan, Reprezentante PERMATIL, Adelino Cabral, haktuir, ONG ne’e hahú realiza atividade akampamentu konservasaun bee no rai iha tinan 2022 iha munisípiu Ermera no Manatuto. Akapamentu daruak ba nível munisípiu iha tinan 2023 iha Aileu, Baucau no Oé-cusse.
“Programa ida-ne’e uluk iha nasionál tinan-rua halo dala-ida, maibé agora tanba nesesidade, maka ami fó apoia KHC hodi kapasita joven sira kona-ba tékniku konserva bee, to’os iha rai-lolon inklui tékniku konserva agrikultura. Ami iha kompromisu apoia joven sira ne’ebé iha inisiativa rasik halo atividade sira,” nia hato’o.
Nune’e mós, Reprezentante Administradór munisípiu Viqueque, Estevão de Carvalho, enkoraja grupu sira-ne’ebé partisipa iha atividade ne’e atu aproveita oportunidade di’ak hodi bele hasa’e koñesimentu tanba atividade hirak ne’e sosiadade sivíl sira maka bele lori ba abitante sira iha baze.
“Ha’u lori Administradór munisípiu nia naran, hakarak hato’o obrigadu ba PERMATIL no KHC, ne’ebé organiza abitante sira halo konservasaun. Meiu konservasaun bee ne’e, ha’u haree iha nasaun Tailándia mós ema halo di’ak tebes hodi sustenta filafali atividade ortikultura sira. Tanba ne’e, ha’u husu ba partisipante sira tenke aproveita hodi apreende maneira konservasaun sira-ne’e,” nia tenik.
Xefe suku Luca, Pribato A.A Guterres, nota atividade ne’e bele motiva joven halo programa di’ak ba suku no aldeia.
“Ho atividade ida-ne’e, ami sei ba implementa iha ami-nia suku tanba iha ami-nia suku iha tempu bailoro menus bee. Entaun, ho atividade ida-ne’e ami bele organiza filafali komunidade halo konservasaun bee no rai,” nia realsa.
Reprezentante Administradór munisípiu Viqueque, Estevão de Carvalho, halo abertura atividade, ne’ebé partisipa hosi diretór servisu munisípal sira inklui grupu hitu hamutuk ema na’in-50 resin hosi suku haat hanesan Uaitame, Bibileo, Luca no Uma-Ki’ik.
Jornalista : Vitorino Lopes da Costa
Editora : Julia Chatarina
