Konfrontu Uatulari uma hitu estragu no asegura suspeitu na’in-lima
DILI, 23 outubru 2023 (TATOLI) – Komandante Jerál Polísia Nasionál Timor-Leste (PNTL), Komisáriu Jerál Polísia, Henrique da Costa, hateten konfrontu ne’ebé akontese iha Suku Macadique, Postu Administrativu Uatulari, Munisípiu Viqueque, foin lalais ne’e, rezulta uma komunidade hitu mak hetan estragu no PNTL asegura ona suspeitu na’in-lima.
Kazu ne’e akontese iha sábadu (21/10) foin lalais ne’e iha Suku Macadique, ne’ebé kauza hosi joven na’in-rua diskute malu to’o lori ba Grupu Arte Marsiál (GAR) hodi provoka malu to’o mosu konfrontu entre suku rua.
Iha konfrontu ne’e, entre Suku Macadique no Afalocai ataka malu, to’o mosu konfrontu bo’ot, uma komunidade sira hamutuk hitu mak hetan estragu, karreta patrolla PNTL ida vidru rahun, tanba hetan tuda no rezulta membru PNTL ida hetan kanek.
“Kazu ne’e ita-nia Eskudra Uatulari ne’ebé hetan apoiu hosi forsa rezerva (Taksforce) no Batallaun Orden Públika Baucau, halo kedan intervensaun iha momentu ne’e kedan hodi konsege neutraliza situasaun iha fatin refere no asegura joven na’in-lima ne’ebé envolve iha kazu ne’e”, Henrique da Costa hateten ba jornalista sira iha Unidade Espesiál Polísia (UEP), segunda ne’e.
Komisáriu Jerál Polísia, informa hafoin PNTL asegura tiha suspeitu hirak ne’e, lori kedan sira ba Komandu Eskuadra Uatulari hodi halo identifikasaun.
“Agora daudaun ita-nia polísia sei halo hela prosesu identifikasaun ba suspeitu sira ne’e depois halo tiha identifikasaun ba sira mak sei submete kedan ba Ministériu Públiku, tanba iha konfrontu ne’e rezulta ema kanek no propriedade komunidade nian balun hetan estragu”, nia konklui.
Jornalista: Natalino Costa
Editór : Zezito Silva
