Livru buletin votu Baucau nian to’o ona, aban halo pakotementu
BAUCAU, 23 outubru 2023 (TATOLI) – Livru buletin votu hamutuk 2.201 ba eleisaun suku to’o ona iha edifisiu Sekretáriadu Tékniku Admistrasaun Eleisaun (STAE) hafoin transporta hosi nasionál.
Diretór STAE Baucau, Natividade Freitas, esplika, materiál hirak-refere ohin transporta mai Baucau hafoin liuhosi seremónia entrega hosi gráfika nasionál ba STAE nasionál ne’ebé akompaña hosi autoridade munisipál hanesan Prezidente Autoridade inklui admistradór postu administrativu sira.
“Agora ami sei halot materiál, ita planu sei halo pakotementu hahú aban durante loron-tolu,” Diretór STAE Baucau hateten iha Vila nova, segunda ne’e.
Hosi tótal livru buletin votu refere iha aumetentu pursentu 10 hosi tótal eleitór sira kompostu livru buletin haat hanesan xefe suku, aldeia, delegadu no delegada inklui materiál naun-sensitivu sira hanesan markadór (spidol), banner, kamizola, lapizera, pregu, regua no seluktan ne’ebé sei fasilita prosesu hotu durante realizasaun elisaun komunitária iha Baucau.
STAE Baucau planeia durante pakotementu loron-ida sei pakote postu admistrativu rua tuir númeru eleitór sira inklui númeru kandidatura xefe suku ne’ebé variadade hanesan postu Vemase sei hamutuk ho Baucau Vila, Quelicai ho Venilale no Laga hamutuk ho Baguia.
“Bainhira remata, loron-27 ita halo ona distribusaun ba postu, suku no aldeia tuir sentru votasaun ne’ebé estabelese ona,” Natividade Freitas akresenta.
Kandidatura xefe suku iha Baucau hamutuk 243 kompostu mane na’in-217 no feto nain-26 kompostu postu admistrativu Baguia hamutuk 30, Baucau Vila na’in-50, Laga 28, Quelicai 62, Vemasse 30 no Venilale hamutuk nian-52.
Eleisaun lideransa iha munisípiu Baucau hamutuk suku 59 hosi tótal sentru votasaun hamutuk 281 ho tótal eleitór sira hamutuk rihun-99 resin.
Jornalista : Natalino Belo
Editór : Rafael Ximenes de A. Belo
