MUNISÍPIU, SEGURANSA, VIQUEQUE

PNTL detein ona suspeitu na’in-rua hosi konfrontu Uatulari-Viqueque

PNTL detein ona suspeitu na’in-rua hosi konfrontu Uatulari-Viqueque

Komandante PNTL Viqueque, Superentendente, João da Costa. Imajen Tatoli/Vitorino Lopes da Costa

VIQUEQUE, 23 outubru 2023 (TATOLI)—Polísia Nasionál Timor-Leste (PNTL) munisípiu Viqueque detein ona suspeitu na’in-rua hosi suku Afaloikai no Macadique, ne’ebé deskonfia envolve konfrontu iha postu Uatulari entre suku Afaloikai no suku Macadique, iha loron sábadu (21/10) maizumenus tuku 16:00.

Tuir Komandante PNTL Viqueque, Superentendente, João da Costa, konfrontu akontese tanba problema ki’ik, maibé tanba laiha pasiénsia ba malu maka ikus mai mosu problema.

“Kronolojia akontesimentu ne’e, abitante suku Macadique tun hosi foho maka ema balun tahan iha área suku Afaloikai. Entaun, ikus mai sira baku malu halai fila bá bolu nia maluk sira hosi suku Macadique maka akontese problema iha sábadu lorokraik, nune’e abitante Afaloikai no Macadique ataka malu hodi rezulta ema balun hetan kanek no abitante Afaloikai sira-nia uma balun rahun. Ami kaptura ona suspeitu na’in-rua no daudaun detein iha sela Eskuadra Uatulari hodi halo prosesu investigasaun,” João da Costa, informa ba jornalista sira iha Komandu PNTL Viqueque, segunda ne’e.

Notísia relevante : PNTL Viqueque aprezenta autór rua konfrontu iha Uatolari ba MP

Tuir Komandante Polísia, suspeitu ne’ebé sai hanesan autór prinsipál konfrontu ne’e na’in-rua ho inisiál JCS idade 26 hosi suku Macadique no ACS idade 25 hosi Afaloikai. Enkuantu testamuña inisial JS hosi Macadique no vítima na’in-tolu inisiál FR ho idade 38 hosi suku Afaloikai, PX idade 32 hosi suku Macadique no Carlito Ximenes idade 49 hosi suku Macadique.

“Tipu kazu konfrontu kategoria ofensa integridade fízika no daudaun ne’e ami rekolla dadus no halo prosesu investigasaun, nune’e bainhira konklui ami ba aprezenta iha Ministériu Públiku (MP). Maski ami seidauk aprezenta ba MP, ami nafatin informa kazu ne’e hodi akompaña tanba kazu ne’e envolve ema barak, ami presiza halo investigasaun kle’an hafoin aprezenta ba MP,” nia akresenta.

Hosi akontesimentu ne’e iha ema na’in-10 inklui membru Polísia na’in-rua hetan kanek kama’an no hetan ona tratamentu iha Sentru Saúde Uatulari. Akontesimentu ne’e mós rezulta karreta patroli PNTL ida no karreta truk ida nia vidru oin ema tuda rahun.

“Maski ami Polísia tun ba halo atuasaun, ikus mai hetan pankada. Akontesimentu ida-ne’e iha postu Uatulari. Ami sei halo identifikasaun ba uma ne’ebé hetan impaktu. Kona-ba akontesimentu ne’e ami nafatin esforsu hodi hamutuk ho autoridade lokál sira atu normaliza situasaun, nune’e povu bele moris hakmatek,” nia hato’o.

Hafoin konfrontu ne’e, Komandu PNTL Viqueque destaka kedas taskforce Viqueque, Batallaun Orden Públiku (BOP) Baucau no PNTL Eskuadra Uatucarbau hodi fó apoia sugaransa ba akontesintu konfrontu iha suku Afaloikai.

“Daudaun situasaun atuál ami haree hakmatek, nune’e parte BOP kontinua halo seguransa iha postu Uatulari,” nia realsa.

PNTL fó sai ona katak Polísia sei fó seguransa másimu iha postu lima nune’e povu bele moris hakmatek hodi hasoru festa eleisaun komunitária.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!