COVALIMA, 23 outubru 2023 (TATOLI) – Polísia Nasionál Timor-Leste (PNTL) munisípiu Covalima detein suspeitu na’in-rua ba kazu asasinatu Rui Amaral Lopes, alunu ida husi Eskola Sekundária Jerál Públiku Suai, iha aldeia Sadahur, suku Maudemo, postu administrativu Tilomar.
Kazu omisídiu ne’e akontese iha sábadu, semana kotuk, pur volta 17h30. “Ita konsege detein suspeitu na’in-rua. Ohin, ita kompleta ona 72h hafoin lori prosesu bá iha Tribunál liuhusi Ministériu Públiku”, Komandante PNTL Covalima, Superintendente Polísia Calisto Gonzaga, hatete iha Santa Rosa, ohin.
Komandante ne’e esplika katak motivu husi kazu omisídiu tanba dezentendementu entre joven sira iha Tilomar ne’ebé liga fali ba iha grupu arte marsiál hodi hakotu Rui Amaral Lopes nia vida hafoin sai husi eskola.
Depois akontesimentu, mate-isin lori kedan bá iha Ospitál Referál Suai no iha domingu (22/10 transporta bá Ospitál Nasionál Guido Valadares (HNGV) atu halo autópsia.
Superintendente Polísia ne’e afirma katak razaun presiza halo autópsia tanba vítima nia mate la’os asidente, maibé tanba insidente ne’ebé uza forsa sai hanesan medida atubele klarifika iha prosesu, nune’e bele hatene nia mate tanba sona ka tanba baku hodi bele halo justifikasaun.
“Suspeitu ne’ebé envolve iha kazu ne’e ho inisiál JC no APC ne’ebé iha sela no sei bolu tan BC ho PA mai hamutuk, pelu menus kompleta ho prosesu oras lori bá iha tribunál”, dehan.
Jornalista: Celestina Teles
Editora: Maria Auxiliadora
