iklan

NASIONÁL, EKONOMIA, HEADLINE

SEFOPE rejista disputa laborál 118 durante fulan-10

SEFOPE rejista disputa laborál 118 durante fulan-10

Ilustrasaun disputa laborál. Imajen/Espesiál

DILI, 23 outubru 2023 (TATOLI)-Sekretaria Estadu Formasaun Profisionál no Empregu (SEFOPE) rejista ona disputa laborál entre traballadór no empregadór hamutuk 118, durante fulan-10, hosi fulan-janeiru to’o outubru tinan 2023.

“Kazu disputa iha tipu oin-oin, hanesan hapara serbisu sein razaun, balun tanba kontratu hakerek buat ida maibé realidade implementa buat seluk, saláriu, no lisensa anuál,” Diretór Nasionál Relasaun Traballu iha SEFOPE, Ângelo dos Santos Veloso, hateten liuhosi programa entrevista eskluziva live streaming Agência Tatoli, I.P, iha estúdiu Farol, segunda ne’e.

Hosi númeru 118 ne’e, rezolve ona disputa 52 iha nível mediasaun, restante prosesu la’o hela tanba dala ruma hosi diresaun bolu empregadór la marka prezensa, enkuantu tuir lei xamada to’o dala-tolu la marka prezensa maka tenke rekorre bá Tribunál Abitrajen.

“Empreza sira maka durante ne’e prepara kontratu ba traballadór sira, ne’ebé bazeia ba Lei Traballu artigu 9 to’o 11 ligadu ho ninia rekezitu sira, bainhira empreza prodús kontratu tenke  manda ba SEFOPE hodi haree katak kontratu ne’e bazeia ba Lei Traballu ka lae. Maibé sira halo kontratu la lori mai ami,” nia akresenta.

Notísia relevante : SEFOPE Covalima rejista kazu disputa laborál 60

Nune’e, Diretór husu ba traballadór sira bainhira mosu problema ruma ho empreza sira iha serbisu fatin, tenke rezolve ho ulun-malirin tanba baze legál iha hodi proteje no komunika ba instituisaun relevante sira hodi solusiona.

“Ita labele utiliza violénsia tanba bainhira mosu ona violénsia maka konsidera krime,” nia hameno.

Dirijente ne’e fó sasin katak, durante sosializasaun Lei Traballu ba traballadór no empregadór, nível koñesimentu atinje 75%, maibé SEFOPE liuhosi Inspesaun Jerál Traballu nota katak iha empregadór balun maka hatene hela lei ne’e maibé ho vontade hakarak viola.

“Sira kompreende ona lei maibé sira nafatin viola lei refere, entaun ami nia knaar nafatin halo sosializasaun, kuandu la kumpre maka tenke aplika koima, maibé nafatin laiha mudansa tenke taka sira-nia empreza,” nia argumenta.

Durante ne’e empreza xinéz, indonéziu, no filipina mak halo investe no komete kazu disputa barak.

“Bainhira akontese disputa, ami hasoru difikuldade bainhira rezolve disputa tanba sira labele ko’alia tetun nein inglés, sira ko’alia de’it mak sira-nia lian, entaun rezolve kazu disputa ulun moras tanba lian ne’ebé ita ko’alia sira la kompreende no ita ko’alia mós sira la kompreende,” nia salienta.

Jornalista     : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!