DILI, 24 outubru 2023 (TATOLI) – Ministériu Edukasaun (ME) no Embaixada Indonézia hakarak loke feira edukasaun ne’ebé sei realiza iha munisípiu sira hodi promove setór ne’e ba komunidade no estudante sira atu atrai sira hodi kontinua estuda iha nasaun viziña.
Ba asuntu ne’e, Ministra Edukasaun, Dulce de Jesus, no Embaixadór Indonézia iha Timor-Leste, Okto Dorinus Manik, realiza ona enkontru hodi diskute expo refere.
“Ha’u apresia programa ne’e tanba kapás tebes. Ha’u ho Embaixadór Indonézia diskute ona, nune’e bele fahe informasaun ba estudante sira iha kada munisípiu ne’ebé hanoin atu kontinua sira-nia estudu iha Indonézia”, ministra hatete hafoin enkontru, iha Vila Verde, ohin.
Nia dehan hanoin di’ak ne’ebé Embaixadór Indonézia hato’o hodi realiza expo iha kada munisípiu ne’e hanesan feira ne’ebé maka daudaun sira loke iha nasionál ne’e.
“Durante ne’e estudante sira iha Dili de’it maka asesu ba programa bolsa estudu bá Indonézia, maibé ba tinan ida ne’e sira hanoin lori informasaun bá munisipiu sira atu estudante bele asesu hotu”, realsa.
Embaixadór Indonézia, Okto Dorinus Manik, haktuir katak daudaun embaixada loke Indonesia Higer Education Expo iha sentru kulturál iha Dili. Ne’e duni liuhusi okaziaun ida ne’e Indonézia no Timor-Leste iha kompromisu ida hakarak alarga tan expo ne’e bá munisípiu sira, nune’e estudante sira mós bele hetan informasaun kona-ba universidade sira iha país viziñu.
“Ita halo ida ne’e tanba ita hakarak estudante sira iha munisípiu bele komprende ho didi’ak universidade iha Indonézia ne’ebé maka hetan ona akreditasaun no iha kualidade di’ak no merese ba estudante sira atu hala’o sira-nian estudu. Agora, sira halo ona esforsu atu tempu besik ekipa rua bele serbisu hamutuk tun bá munisípiu sira hodi implementa ona atividade expo iha ne’ebá”, dehan.
Indonesia Higer Education Expo realiza, entre loron 24 no 26 outubru, ne’ebé partisipa husi universidade públika no privada hamutuk 40. Feira ne’e oferese bolsa estudu ba timoroan sira atu kontinua nia eskola husi diploma III to’o doutoramentu.
Feira ne’e hanesan atividade rotina husi sentru kulturál no embaixada Indonézia dezde 2016.
Okto Dorinus informa timoroan ne’ebé maka hetan ona bolsa estudu bá Indonézia iha tinan 2022 hamutuk 359 no iha tinan ida ne’e to’o de’it fulan-jullu na’in-209. “Espera fulan ida ne’e bá oin bele aumenta tan númeru bolsa estudu ba timoroan sira”, afirma.
Jornalista: Tomé Amado
Editora: Maria Auxiliadora
