VIQUEQUE, 24 outubru 2023 (TATOLI)—Grupu Pekuária, Asa-Afadae iha aldeia Asa-Afadae, suku Loiulu, postu administrativu Uatucarbau, munisípiu Viqueque, daudaun ne’e, presiza veterinária hodi halo prevensaun ba moras manu lokál.
“Ami joven organiza malu buka moris maka ami kria planu hakiak manu, maibé manu ne’ebé sosa hodi hakiak ne’e pesti kona beibeik no mate tuir hela de’it. Laiha pesoál saúde animál ruma mosu iha ami-nia suku hodi halo vasina ba manu sira, ami presiza tebes saúde animál halo netik vasina ba manu sira,” Xefe Grupu Asa-Afadae, informa ba Agência Tatoli, iha postu Uatucarbau, tersa ne’e.
Notísia relevante : Kompetisaun Planu Negósiu Inovativu 2023 área pekuária termina iha outubru
Grupu ne’e ho membru inisiál na’in-ualu, hahú inisiativa hakiak manu hamutuk 35 iha abríl 2022, maibé mate no to’o agora sei mate nafatin tanba laiha veterinária ruma hodi salva.
“Ami moris iha área rurál, ami garantia hakiak manu hodi sustenta nesesidade uma-laran, nune’e ami esforsu hakiak manu, maibé pesti ataka beibeik. Ami hakarak sosa ai-moruk maibé lahatene ai-moruk saida maka bele kura manu nia moras sira. Tanba ne’e, ami husu ba parte relevante hosi koloka pesoál servisu saúde animál sira hodi tama sai suku halo vasinasaun ba manu sira,” nia akresenta.
Maski nune’e, grupu nafatin iha kompromisu hodi nafatin halo atividade tanba liuhosi meiu ida-ne’e mak bele hadi’a moris.
Iha fatin ketak, Diretór Servisu Agrikultura Viqueque, Fernando Joaquim, hateten, daudaun ne’e koloka ona veterinária iha postu Uatulari no Uatucarbau hodi tau-matan ba animál sira.
“Iha postu Uatucarbau iha pesoál saúde animál hamutuk lima maka destaka iha ne’ebá, dalaruma abitante sira maka la hatene. Bainhira manu moras abitante sira bele fó hatene ba sira ne’ebé destakadu ona iha postu ida-idak, ita iha ai-moruk hodi halo tratamentu ba animál sira. Durante pesoál saúde animál sira hala’o atividade vasina rutina ba animál hanesan fahi, karau inklui manu sira iha munisípiu Viqueque,” nia hato’o.
Jornalista : Vitorino Lopes da Costa
Editora : Julia Chatarina
